লাক্লিবা চয়োল অনীগী মনুংদা লৈবাক অসীগী লৈরিবা পুলিস ষ্টেসন পূম্নমক্তা সিসিটিভি কেমেরাশিং মপূঙ ফানা ইন্সটোল তৌবা লোইরগনি।হৌজিক কেমেরাশিং অসী ইন্সটোল তৌবগী অকনবা থবক-থৌরমশিং পায়খৎলি অদূগা মরী লৈনবা অথোরিটিশিংনা মদূবু য়াম্না কূপ্না শেন্নদুনা য়েংশিল্লি হায়না এটোর্নি জেনরেল, আর ভেনকত্তরম্মননা সুপ্রিম কোর্টতা ফোঙদোকখ্রে।
এপেক্স কোর্ট অসীগী জষ্টিস বিক্রমনাথ অমসুং জষ্টিস সঞ্জিব মেহটাগী বেঞ্চতা মহাক্না ৱাফম অসি ফোঙদোকখিবনি।লৈবাক অসীগী পুলিস ষ্টেসন পূম্নমক্তা সিসিটিভি কেমেরাশিং খিনগদবনি অদূগা হৌজিক অসীগুম্বা কেমেরা খিনবা পুলিস ষ্টেসন অয়াম্বদা কেমেরা ফঙ্কসন তৌদনা নত্রগা ওপরেট তৌবা য়াদবা কেমেরানা অয়াম্বা ওইরি হায়বা মীয়ামগী ৱাফমশিংদা য়ূম্ফম ওইদুনা,লৈবাক অসীগী খ্বাইদগী অৱাঙবা আইনগী লোয়শঙ অসীনা সু-মোটু কেস অমা লৌখত্তুনা হিয়ারিং চত্থরকখিবনি।
মসীগী মখা তারকপদা, চৎলিবা এপ্রিল থা অসীগী তরুক্তা এপেক্স কোর্ট অসীনা পীখিবা য়াথং অমগী মতূঙ ইন্না ঙরাং য়ুনিয়ন হোম সেক্রেটরি মশামকসু লাকখি। লৈবাক অসীগী লৈরিবা পুলিস ষ্টেসন পূম্নমক্তা সিসিটিভি কেমেরাশিং মপূঙ ফানা খিনবগী থবক লাক্লিবা চয়োল অনীগী মনুংদা মপূঙফানা লোইশিনগনি হায়বগী অচেৎপা থাজবা পীখি।