কোকোমিনা লুচিংবা মীয়াম্না চিফ মিনিষ্টর বাংলোদা থোমজীল্লকপদা এস এফকা মূক্নখ্রে

চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ ১.৩০ রোম তারকপদা কুকি মিলিটেন্টশিংনা বিষ্ণুপুর দিষ্ট্রিক্টকি মোইরাং সব-দিবিজন মনূঙচন্না লৈরিবা ট্রোংলাউবি অৱাং লৈকায়দা বোম কাপশীন্দূনা নৌরিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদূবু য়ানিংদবা ফোঙদোক্তুনা খুঙ্গং অদূগী মনাক্তা লৈরিবা সি আর পি এফকি পোষ্ট তা থোমজীল্লকখিবা মীয়ামদা পেরামিলিতরী ফোর্সশিং অদূনা মথোঙ খঙদনা নোংমৈ কাপথোরকপদা মীওই অনী খূদক্তা শিখিবা অমসুং মীওই ৩০ রোম শোকখিবা অদূগী মনূঙদগী অশোকপা অমসু ঙরাং অয়ুক পূঙ ৯ লোম তাবদা লৈখিদ্রে।
হোস্পিটালদা ঙরাং লৈখিদ্রবা মীওই অদূ কুম্বি তেরাখোং ৱার্দ নম্বর ৭ তগী ৱাহেংবম বোবি (২৯) ,অপোকপা দব্লিয়ু ইবোচৌবা কৌই হায়রি।মহাক্কি পীক্লিবা মচানূপী অমা লৈহৌরি।মহাক নোংমগী অফংবা থবক শূরগা ঈমূঙ পুজরিবা মীচম অমনি হায়রি।মহাক থারগা হন্দক ট্রোংলাউবীগী থৌদোক্তা শিখিবা মীওই মশীং মঙা শুখ্রে।
লৈখিদ্রবা অঙাঙ অনী অদূ নত্তবদা, থৌদোক্তুদা অহানবগী ওইনা লৈখিদ্রবা মীওই অনী অদূগী মমীংনা তোপ ৱাইখূরোক্তগী লাইশ্রম জিতেন (৪১) অপোকপা উদয়চান্দ অমসুং তেরা লুক্রাম লৈরক্তগী হুইদ্রোম মাইকেল (৩২) অপোকপা মোহোন কৌই।
থৌদোকশিং অসীগী মতাঙদা কোকোমিগী মায়কৈদগী অকনবা মওংদা য়ানিংদবা ফোঙদোরকপগা লোয়ননা মতীক চাদ্রবা চিফ মিনিষ্টর য়ূম্নাম খেমচান্দ অমসুং ষ্টেট লৈঙাক্কি হোম মিনিষ্টর গোবিন্দাস কোন্থৌজম খূদক্তা ফম থাদোক্কদবনি হায়বা খোল্লাউশিংগা লোয়ননা কোকোমিনা লুচিংদুনা মশীং য়াম্লবা মীয়াম্না চিফ মিনিষ্টরগী বাংলো তম্না থোমজীল্লকখ্রে।থোমজীল্লকখিবা মীয়াম অদূগা সেক্যুরিটি ফোর্স পার্সনেলশিংগা মূক্নরকপদা পুলিসনা ট্যের গ্যাস সেল ২০ হেন্না কাপখি।
লৈখিদ্রবা মীওই অহূম অদূদা ঈকায়খুম্নবা অমসুং অৱাবা ফোঙদোকপগী থৌরম অমা ঙসী ষ্টেটকি ওইনা পাঙথোক্কনি হায়না ফোঙদোরক্লি।সেন্ট্রেল গভর্ণমেন্টকী এমপ্লোয়িশিংসু ওফিসতা চৎপা য়ারোই, অৱাবা ফোঙদোক্লিবা অসীদা শরুক য়াগদবনি, সেন্ট্রেল ওফিস খূদীঙমক থিংগদবনি হায়না কোকোমিগী ৱাঙাঙলোয় নহাকপম সান্তনা ফোঙদোকখি।