তঙায়ফদবা ফীভমদগী সি আর পি এফনা নোংমৈ কাপখিবনি: পুলিস

চৎলিবা এপ্রিল থা অসীগী তরেৎকি নুমিৎয়ুংবা মতূঙ পূঙখায় অমরোম চৎপা মতমদা বিষ্ণুপুর দিষ্ট্রিক্টকি মোইরাং পুলিস ষ্টেসন মনূঙচন্না লৈরিবা গেলমোন ভিল্লেজদা লৈবা সি আর পি এফকি কেম্পতা মীওই ৫০০ রোম থোমজীল্লকখিবা থৌদোক অদূদা সি আর পি এফ পার্সনেলশিংনা নোংমৈ কাপ্পদা মীওই অহূম লৈখিদবা, অদুগা মীওই ৩০ রোম্না শোক্তুনা হোস্পিটালশিংদা লায়কন্নখিবা অদূ তঙায়ফদবা ফীভমদগী সেক্যুরিটি ফোর্সনা নোংমৈ কাপখিবনি হায়না মনিপুর পুলিসনা খঙহল্লক্লি।

গেলমোন কেম্প অদূ ট্রোংলাউবী খুনগা হেক থংননা মনীংদা লৈবনি।কুকি মিলিটেন্টশিং ওইগনি হায়না চিংনবা খূৎলায় মতীকচানা পায়বশিংনা নুমিৎ অদুগী অঙনবা নোঙাল্লমদাইদা বোম কাপশীন্দুনা ট্রোংলাউবী অৱাং লৈকায়দা লৈবা ঈমূঙ অমগী পীক্লিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদূবু য়ানিংদবা ফোঙদোক্তুনা মায়কৈ অদোমগী মীয়াম্না সি আর পি এফকি কেম্প অদুদা থোমজীল্লকখিবগা লোয়ননা কেম্প অদুদা খামদুনা লৈবা সেক্যুরিটি গী গারিশিং অমসুং লন-থুম কয়ামরুম মৈ থাদুনা অমাঙ-অতা থোকহনখি।

মখোয়বু লাকশীন্ননবা অমদি অশাওবা কয়াদু পূক্নীঙ ফাথনবা সেক্যুরিটি পার্সনেলশিংনা ঙমজবা পাম্বৈ শীজীন্নদুনা হোৎনরবসু লাক্ন-ফানবা ঙমদ্রবা মীয়াম অদুনা কেম্প অদূগী আর্ম কোট্টা চঙশীল্লকপা হৌরকখি। মখোয়না আর্ম কোট তম্না থোমজীল্লক্লগা খূৎলায়শিং নমদুনা লৌননবা হোৎনরকপদগী সেক্যুরিটি ফোর্সনা তঙায়ফদনা নোংমৈ রাউন্দ খরা কাপ্পা তাখিবনি। মদুদা মীওই অনীদি খূদক্তা শিখি অদুগা মীওই ৩০ রোম অশোক-অপন মায়োক্নদুনা হোস্পিটালশিংদা পুখৎখিবনি হায়না পুলিসকি চেরোল অসীদা মখা তারক্লি।