মৈতৈ-পাঙলগী সি এস ওশিংনা মিনুথোং হত্তাগী লম্বী থিংদুনা ট্রোংলাউবী থৌদোকপু কন্না য়ানিংদবা ঊৎখ্রে

ঙরাং অহীঙ নোংয়াই মতূঙ পূং ১.৩০ রোম তারকপা, মীয়াম্না নুঙাইনা তূমথনরকখিবগা লোয়ননা মীচীক-মীরাওখোল তারক্ট্রবা মতমদা ঈখঙ খঙহৌদনা অফবা খূৎলায় পায়রবা, কুকি মিলিটেন্টশিংনা, বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী খুঙ্গংগী অনকপা মফমদা লৈবা চীঙথক্তগী বোম অমদি নোংমৈ কয়া অতৎ-অখম লৈতনা কাপশীল্লকপদগী চহী মঙাখক্তা ঙায়রিবা অঙাঙ নূপামচা অমগা, শুপ্নগী থা মঙাখক্তা ঙায়রিবি, পোকমীন্নবী মচন্নূপী অমগা হাত্তোকপিখিবা অমসুং মখোয়গী অপোকপী মমাসু তমথিবা মওংদা শোকহনখিবা থৌদোক অদূবু য়াম্না কন্না য়ানিংদবা ফোঙদোক্তুনা মনিপুরগী মফম কয়াদা মীয়াম্না হীঙশা য়াওবা খোঙজঙ কয়া চঙশীন্নরক্লি।
ট্রোংলাউবিদা অঙাং অনী হাৎখিবা,অপোকপী মমাবু তমথীনা শোকহনখিবা অদুবু য়ানীংদবা ফোঙদোক্তুনা মীয়াম্না লম্বী থিংবা, গারিশিং মৈ থাবা য়াওনা অকনবা ঈরাং হৌরকপদা লমদম অসীগী অতিয়াদা হৌজিক সেক্যুরিটি ফোর্সশিংনা কাপথোক্নরকপা নোংমৈ, ট্যের গ্যাস, রব্বর বূল্লেট, মোব বোম, ৱাটর কেননগী খোঞ্জেল অমসুং মদূগী মৈখূশিংনা পূম্মম মমশীন্দুনা লৈখ্রে।
থৌদোক অদূবু য়ানিংদবা ফোঙদোক্নরকখিবগা লোয়ননা ট্রোংলাউবি এরিয়াদা মীচম-মীয়াম ঙাক-শেন্ননবা পোষ্ট হাংদোক্তুনা লৈরিবা সেন্ট্রেল সেক্যুরিটি ফোর্সেস না টেরোরিষ্টশিং অদুদা নোংমৈ মরূ অমা ফাওবা কাপখিদবা থৌওংদু য়ানিংদবা উত্তুনা মীয়াম্না সেক্যুরিটি ফোর্সেস লৈরিবা মফমদুদা থোমজীল্লকপদা মীচম অহুম হাৎখিবা অদুবুসু মৈতৈ পাঙল কাঙলূপকি সি এস ওশিংনা অকনবা মওংদা খোয়শাওনবা ঊত্তুনা লম্বী থিংখিবনি।
ওল মনিপুর মৈতৈ-পাঙল ৱেলফ্যের ওর্গানাইজেসন না লুচিংদুনা হত্তা-মিনুথোং লম্বী থিংখিবা অদুদা মীয়াম্না মপূঙ ফানা শৌগৎখি।