ত্রোংলাউবি অৱাং লৈকায়দা কুকিনা কাপশীল্লকপদা পীক্লিবা মচীন-মনাউ অঙাং অনী শিরে

হৌখিবা অহীং নোংয়াইদা বিষ্ণুপুর দিষ্ট্রিক্টকি মনূঙচন্না লৈরিবা ত্রোংলাউবি অৱাং লৈকায়দা কুকি মিলিটেন্টশিংনি চিংনবা, শকখঙদবশিংনা বোম অমদি নোংমৈ কয়ামরুম কাপশীল্লকপা থৌদোক অমদা, মমাগা তূম্মিন্নদুনা লৈবা অঙাঙ অনী লৈখিদ্রে অদুগা মমা অদুসু শোকপদগী লায়কন্নখ্রে হায়রি।লৈখিদ্রবা অঙাঙ অনীদু বোম্না পানবা ঙাক্তনি।চহী মঙাগী অঙাঙ নুপামচা অমগা, মহাক্কি পোকমিন্নবা, শূপ্নগী থা ৫ খক্তা ঙায়রিবি মচন্নূপী অমগা খূদক্তুদা লায়কন্নবা নংদনা লৈখিদবনি হায়রি।

থৌদোক অদূগী পাউ ফংবদগী খোয়শাওনরবা বিষ্ণুপুর অমদি মোইরাং মায়কৈগী মীয়াম, মরূওইনা ঈমা মৈরা পায়বীশিং থোক্লক্তুনা মোইরাং পুলিস ষ্টেসন মমাঙদা মৈ থাদুনা অকনবা প্রোটেষ্ট তৌখ্রে। মীয়াম্না ইম্ফাল -মোইরাং -চুরাচান্দপুর লম্বী থিংদুনা থমখ্রে। পুলিস অথোরিটি অমদি সেন্ট্রেল সেক্যুরিটি ফোর্সনা ঙসী ফাওবা কুকি মিলিটেন্ট অমত্তা ফাগত্তুনা চৈরাক পীবা ঙমদ্রিবগী নুংগী ওইবা ৱাহন্থোক করিনো হংলদুনা, লম্বীদা পুলিস অমদি সেন্ট্রেল ফোর্স পার্সনেলশিংনা পেট্রোলিং চৎপা অমদি সার্চ ওপরেসন পাঙথোকপগী ৱাহন্থোক লৈত্রে। মরম অদুনা, কুকি -জো কাঙলূপকি মিলিটেন্টশিং অসী মীয়াম্না থেংনরগে, খূৎলায় পায়বা সেক্যুরিটি পার্সনেলশিং মশা-মশাগী ময়ূমশিংদা লৈবিখ্রো হায়দুনা সেক্যুরিটিগী গারিশিং থিংদুনা চৎহনখিদবনি।

পোৎ পুরকপা গারি ট্রক অহুমসু লম্বীদা মীয়াম্না মৈ থাখ্রে।চৈরকশিদা বিষ্ণুপুর দিষ্ট্রিক্টকি মফম অমদা পোকখায়দ্রিবা রোকেট লোঞ্চর অমসু ফংবা ঙমখ্রে হায়না পুলিসকি ছোর্স অমদা খঙহল্লক্লি। লৈখিদ্রবা অঙাঙ অনী অদুগী শোক্লবী মমাদুসু হৌজিক ইম্ফালগী রাজ মেদিসিটিদা লৈবা আই সি য়ূদা অরুবা ফীভমদা লায়কন্নরি হায়রি।