সেন্সসকি মতাঙদা উনদুনা খন্নসি হায়বা সি এস ওশিংগী ৱাফম তরাম্না ওকই:খেমচান্দ

মনিপুরদা সেন্সসকি থবক-থৌরমশিং পায়খত্রিঙৈ মমাঙদা মীতোপশিং হান্না মশক খঙদোক্তুনা মশাগী মরৈপাকশিংদা হলহনখিগদবনি, এন আর সি মপূঙফানা চৎনহনগদবনি, আই দি পিশিং মপূঙ ফানা মশা-মশাগী ময়ূমশিংদা হান্না হঞ্জিলহল্লু হায়না সিভিল সোসাইটি ওরগানাইজেসনশিং অমসুং মীয়াম্না হৌরক্লিবা ঈহৌ অসী মরম চাবা ঙাক্তনি। সেন্সসকি মতাঙদা নীঙথীনা খন্নসি হায়না সি এস ওশিংনা ষ্টেট লৈঙাক্কি মীৎয়েং চিংশিল্লক্লিবা অসী তরাম্না ওক্লি হায়বা ৱাফম ঙরাং চিফ মিনিষ্টর য়ূম্নাম খেমচান্দনা ফোঙদোকখ্রে।

ইম্ফাল ৱেষ্ট দিস্ট্রিক্টকি এস পি ওফিস কমপ্লেক্সতা লৈরিবা খ্বাংজেং লাইরেম্বা -লাইরেম্বি অনীগী মচা-মনাইশিংনা চহীগী চরৈ-ফীজোল হোংজবগী ৩২ রক শুবা থৌরমদা শরুক য়াবা লাকখিবা চিফ মিনিষ্টরনা ৱাফম অসি ফোঙদোকখিবনি।লাইরেম্বা-লাইরেম্বী অনীনা মচা-মনাই ওইজরিবা ঐখোয়দা য়াইফা-থৌজাল পীবীবগা লোয়ননা লমদম অসীদা ঈঙ-তপ্পা,তঙদূ-লৈতাবা, নুংশিনবা অমদি চাওখৎপা পীনবিবা ওইরসনু অদূগা আই দি পিশিং মশা-মশাগী য়ূমশিংদা অথুবা মতমদা হঞ্জিনবা ঙম্বগী থৌনা পীনবিরম্বা ওইরসনু হায়না চিফ মিনিষ্টরনা মখা তানা ফোঙদোকখি।

থৌরমদুদা শরুক য়াখিবা পাৎশোয় এ সীগী এম এল এ সাপম কুঞ্জকিশ্বরনা পাউমীশিংগী ৱাহংগী পাউখুম পীবদা, সেন্সসকি মতাঙ অসী মনিপুরগী সি এস ওশিং,অমদি মীয়ামগী থম্মোয় শোক্লোইদবা মওংদা অমসুং কন্সটিট্যুসন্নসু য়াগদবা অমদা ৱারোয়শিন পুরক্নবা লেজিসলেটরশিং কূপ্না খন্নরি হায়খি। ইম্ফাল ৱেষ্ট দিষ্ট্রিক্টকি দিসি ময়াংলম্বম রাজকুমার অমসুং দিষ্ট্রিক্ট অসীগী এস পি কে এস ঐচ শিবকান্তসু থৌরমদুদা শরুক য়াখি।