থোক্লিবা হীঙশাগী ঈরাঙ অসী মখা তাহন্দনবা ঐখোয় পূন্না হোৎনমিন্নসি: সৈত্যব্রত্ত

মনিপুরদা হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসী মখা তানা থোকহন্দনবা ঐখোয়না কম্যুনিটিগী খেন্নবা থমদনা পূন্না হোৎনমিন্নিসি, কাঙলূপকি ঈরাং লৈরবা লমদম অমদা শান্তি পুরকপা অমদি চাওখৎ-মায়কৈদা চঙশীল্লকপা ঙম্লোই, মসী মালেমগী পুৱারিনা অচৌবা খূদম্নি হায়না মনিপুর লেজিসলেটিব এসেমব্লিগী স্পীকর থোকচোম শৈত্যব্রত্তনা ফোঙদোকখ্রে। ঙরাং মহাক্কি য়াইস্কুল কেন্দ্রগী মনূঙচন্না লৈরিবা ব্রহ্মপুর নহাবমদা লৈবা মদন মোহঞ্জিগী নৌনা শাবা লাইশং অমা শঙ্গাবগী থৌরমদা শরূক য়ারদুনা স্পিকরনা ৱাফম অসী ফোঙদোকখিবনি।

মনিপুরগী মীয়াম্না নুংশিবিদুনা হৌখিবা কুমশিং ২০১৭ তগী ষ্টেট অসীদা বি জে পিগী অনৌবা লৈঙাক অমা লাকখি। লাইবক থীবদি চহী অমরোম মীয়ামগী চাওখৎ-থৌরাংগী থবকশিং পায়খৎপা হৌরকপা মতমদুদা মালেমগী তমথিরবা কোবিদ-১৯ লাইচৎ মায়োক্নরকখি। মীয়ামগী চাওখৎ-থৌরাংগী থবকশিং মঙম শান্না, মতীঙ লৈনা পায়খৎপা ঙমদ্রিঙৈ চৈরক্তা লৈঙাক পায়বগী মতম লোইশিনখি। কুমশিং ২০২২ দসু মীয়াম্না বি জে পিগী লৈঙাক শেম্ননবা মেন্দেট পীরকপদগী অনীশুবা বি জে পিগী লৈঙাক অমা শেমদুনা লৈবাক্কি ওইবা চাওখৎ থৌরাংগী থবক পায়খৎপা হৌরকপগী চহী ওল্লকপদা কুকি-মৈতৈ অনীগী ঈরাং থোক্লক্তুনা হৌজিক ফাওবা লোইশিনবা ঙমদনা লৈরিবসি অফবা খূদম নত্তে হায়বা ৱাফম ফোঙদোকখি।

ঐখোয় খূদীঙমক্না খূৎশম্নদুনা ঈরাং অসী মখা চত্থহন্দনবা হোৎনমিন্নসি হায়খি।মসীগা লোয়ননা সোসিয়ল মেদিয়াদা তোকঙা শন্দোকপা লেপ্পিয়ু, মেদিয়া অসীবু অরানবা মায়কৈদা শীজীন্নবগী থৌওং খূদক্তা তোক্লসি হায়না সৈত্যব্রত্ত না মখা তাখি।