কে জেট সিগী চ্যেরমেন থাংলেটকি য়ূমদা মীয়াম্না এত্তেক চত্থরকখ্রে

হৌখিবা মার্চ ২১ গী নুংদাং পূঙ ৭ খরা হেল্লকপদা চিফ মিনিষ্টর য়ূম্নাম খেমচান্দ গা ফম্মিন্নদুনা মনিপুরদা হৌজিক মায়োক্নরগা লৈরিবা হীঙশাগী ঈরাঙ অসী মতম পূম্নমক্কি ওইনা ৱারোয়শিন পুরক্তুনা মহৌশাগী ঈং-তপ্পা শক্তম অদু অমূক হঞ্জিল্লক্নবগী ৱাফম কয়ামরুম খন্নবদা শরূক য়ারুবা কুকি -জো কাউন্সিলগী চ্যেরমেন হেনলিয়ান্থাং থাংলেটকি চুরাচান্দপুরদা লৈবা য়ূম অদূ হৌখিবা মার্চ ২২ গী নুংথিল পূঙ ৩ লোম তারকপদা মীওই খরনা নূঙনা থোমজিন্দুনা অমাঙ-অতা থোকহনখ্রে।
য়ূম অদুদা এত্তেক চত্থবগী পাউ ফংবদগী সেক্যুরিটি ফোর্স চঙশীন্দুনা মীয়াম অদূ কন্ট্রোল তৌখিবগা লোয়ননা হৌজিক মখাতাবা পামদবা থৌদোকশিং থোকহন্দনবা চেকশীন্না ঙাক-শেন্দুনা থমখ্রে হায়রি। চৎলিবা মার্চ থা অসীগী ২১ দা কুকি -জো কাউন্সিলগী লুচিংবশিংগা মনিপুরগী চিফ মিনিষ্টর য়ূম্নাম খেমচান্দগা মীফম অমা গুৱাহাটিদা পাঙথোক্তুনা ৱারী শান্নখিবনি।কুকি অমসুং তাঙ্খুল কম্যুনিটি অনীগী মরক্তা থোক্লিবা উংখৎনবগী থৌওংশিং অসি অথূবা মতমদা ৱারোয়শিন অমা পুরক্নবা অমদি আই দি পিশিং মশা-মশাগী ময়ূমদা হঞ্জিলহনবা য়াননবা থৌরাংশিং পায়খৎনবগী মতাঙদা মরুওইনা খন্ন-নৈনখিবা মীফম অদুদা হৌজিক লৈরিবা বফর জোনশিং ঈকায় খুম্নবগা লোয়ননা কুকি-জো কম্যুনিটিনা তাল্লিবা দিমান্দশিং অসীগী পোলিটিকেল সোল্যুসন অমা পুরক্ট্রিঙৈ চৈরকশিদা বফর জোনশিং অসী নীংথিনা ঙাক্তুনা থমগদবনি হায়বা ৱাফমশিং কুকি -জো কাউন্সিলগী মায়কৈদগী চিফ মিনিষ্টরদা থমখিবনি।
লৈঙাক্না লমদমসিদা মহৌশাগী ঈং-তপ্পা শক্তম হঞ্জিল্লক্নবা থবক কয়ামরুম পায়খৎলক্লিবা অদূগী মতাঙদা চিফ মিনিষ্টরনা কে জেট সিগী লুচিংবশিং অদুদা ময়েক শেংনা ফোঙদোকখিবনি।