মীতোপ খন্দোক্ট্রিফাওবা মীকোক থীবা য়ারোই:জে এফ দি

মনিপুরগী ওইনা হৌজিক মপান্দগী চঙশীল্লক্তুনা চীঙখোঙ-চীঙয়াশিংদা মশীঙ থীঙমদ্রবা মীতোপ মীয়ান কয়ানা খুন্দাদুনা লৈরিবশিং অসি হান্না মশক খঙদোক্তুনা মশা-মশাগী মরমদমদা হলহনখ্রবা মতূঙদা অমুক হন্না চঙশীল্লকপা য়াহন্দনবা লৈঙাক্না লৌখৎফম থোকপা অকনবা চেকশিন-থৌরাংশিং কাঙলোন চুম্না লৌখৎকদবনি। মীতোপ্না লমদমশিগী মনূঙদা অমদি অকোয়বদা লৈরিবা চীঙয়া-তময়াদা মখে লাংদুনা লৈরবা মতমসিদা মখোয়বু তকথোক্নবা হোৎনবগী মহূত্তা রাজনিটি তৌরিবনি হায়দুনা কোয়চেন চেন্দুনা শ্বায়দা হেরো শাদুনা লৈগদবা নত্তে। মীতোপ খন্দোক্ট্রিফাওবা রাজনিটি তৌবা লেপকদবনি হায়না কেম্পেইন ফোর জষ্ট এন্দ ফ্যের দিলিমিটেসন (জে এফ দি) গী কনভিনর জিটেন্দ্র নিঙোম্বনা অকনবা ৱাফম ফোঙদোকখ্রে।

ঙরাং ককচীঙ দিষ্ট্রিক্টকী সুগনু কৈথেলদা মফম অদূগী চীঙ-তম কম্যুনিটি হোলদা সুগ্নু অপূনবা মৈরা পায়বী লূপকা খূৎশম্নরগা পাঙথোকখিবা কেম্পেন অমদা জিতেন্দ্রনা ৱাফম অসী ফোঙদোকখিবনি।লূপ অসীনা পরীং নাইনা চত্থরক্লিবা সেন্সসকি মতাঙদা খন্ন-নৈনবগী থৌরম অদূগী মখা চত্থরকপা ওইনা পাঙথোকখিবা মীফম অদুদা মহাক্না হায়, মালেমগী ওইনা মীকোক থীবগী থবক অসী লৈবাকশিং অদূগী লৈজরিবা মীওইশিং অদূগী মশীঙ খঙদোকপগা লোয়ননা মখো‌য়গী খুন্নাইগী,শেল-থুমগী অমদি অতৈ হীরমশিংদা কূপ্না য়েংশিন্দুনা লৌখৎপা দেটা অমা অমনি। হায়রিবা দেতাশিং অদূগী মতূঙ ইন্না লৈঙাক্না লমদম অদূগী মীয়ামগী চাওখৎ-থৌরাংগী থবক-থৌরমশিং পায়খৎনরিবনি হায়না ফোঙদোকখি।

খ্বাইদগী অফবা খোঙথাঙ অমা ওইরিবা সেন্সসকি থবক অসী মনিপুরদা হৌজিকমক্কি ওইনা মীয়াম্না অথীংবা পীরিবগী মরমদি মনিপুরদা মীতোপ ময়াম হৌখিবা কুমশিং ১৯৫১ গী মতূঙদা চঙশীল্লক্তুনা খুন্দারিবশিং অসী হান্না মশক খঙদোক্তুনা মশা-মশাগী মরমদমদা হলহনখ্রবা মতূঙদা সেন্সস পাঙথোকসি হায়বগীনি।এন আর সি নত্রগা মসীগা মান্নবা কাঙলোন অমা চৎনহন্দ্রিবা ফাওবা সেন্সসকি থবক অমত্তা পায়খৎহন্দনবা জে এফ দি না মীয়ামগা লোয়ননা অপূনবা ৱারেপ লৌরে হায়না নিঙোম্বনা মখা তানা ফোঙদোকখি।