মনিপুরদা মতম চানা রিন্যু তৌদবা মেদিকেল ফেসিলিটি কয়া হাংদুনা লৈরি

মনিপুরদা হৌজিক লন্নাইগী অমদি লৈঙাক্না চল্লাইবা মেদিকেল ফেসিলিটি কয়ামরুম লৈজরবসু মওং-মরীল তানা, নিয়ম চুম্না চল্লাইবা ক্লিনিক নত্রগা হোস্পিটালগী মশীঙদি য়াম্না হন্থনা লৈরি হায়না ষ্টেট লৈঙাক্কি দিরেক্টরেট ওফ হেল্থ সার্বিসেসতগী ফংবা ইনৌ নৌবা দেটা অমদা খঙহল্লক্লি। পাউ অসিগী মতূঙ ইন্না, মনিপুর নর্সিং হোম এন্দ ক্লিনিক্স রেজিষ্ট্রেসন এক্ট,১৯৯২ গী মখাদা হৌজিকমক্কি ওইনা শকখঙলবা মেদিকেল ফেসিলিটি অমত্তা দিষ্ট্রিক্ট অহূমদা লৈত্রি।চৈরকশিদা ইম্ফাল এরিয়া য়াওনা দিষ্ট্রিক্ট খরদা হাংদোক্লিবা লন্নাই দেন্টেল ক্লিনিকশিং অমসুং আই ক্যের ফেসিলিটি অয়াম্বা এক্ট অসিগী মখাদা মশক খঙলবা, রেজিষ্টর তৌরবা ওইদ্রি। হায়রিবা ফেসিলিটিশিং অসীদা সধারন মীয়াম্না নোংমা কাংদনা লায়েংবগী থবক চত্থনরিবসি মিপাইনিঙায় ওইরি হায়রি।

ষ্টেট অসীগী দিষ্ট্রিক্ট ১৬ লৈরিবা অসিগী মনূঙদা দিষ্ট্রিক্ট অহূমদি ঙসিফাওবা লন্নাইগী হোস্পিটাল লিংখৎচগে হায়বগী ক্লেইম তৌরকপা অমত্তা লৈত্রি হায়রি।মনিপুর নর্সিং হোম এন্দ ক্লিনিক্স রেজিষ্ট্রেসন এক্ট, ১৯৯২ অসিগী মখাদা হোস্পিটাল, ক্লিনিক, লেবোরেটরি দাইগ্নোষ্টিক সেন্টরনচিংবা পূন্না ৩৫৩ রেজিষ্টর তৌবা লৈরে।মসি ষ্টেট অসীগী অপূনবনি।মসিগী মনূঙদা ইম্ফাল ৱেষ্ট দিষ্ট্রিক্ট তা ১৭৭, ইম্ফাল ইষ্ট দিষ্ট্রিক্ট তা ৭৭, থৌবাল দা ৩৫, চুরাচান্দপুর দিষ্ট্রিক্টকি ওইনা ২১, ককচীঙ দা ১৭ , বিষ্ণুপুর দা ১২, সেনাপটিদা ৬, ঊখ্রূলদা ২, কাংপোকপিদা ২ লৈরি।

নোনে, তেংনৌপল, তমেংলোংনচিবদা অমমম মখাতানা হাংনবা অয়াবসু লৈরে। রেজিষ্ট্রেসন তৌদবা হেল্থ ফেসিলিটি ময়াম চোংথোরক্লিবসি লৈঙাক্না য়েংশিনবা মথৌ তাই হায়না মায়কৈ কয়াদগী নুংনাংবা ফোঙদোক্নরক্লি।