ওল মনিপুর ৱার্কিং জর্নেলিষ্ট য়ুনিয়ন (অমজু) না শীন্দুনা হন্দক চহীগী ওইনা পাউমীশিং অমদি দিরেক্টোরেট ওফ ইনফোর্মেসন এন্দ পব্লিক রিলেসন্স (দি আই পি আর) মনিপুরগী ওফিসিয়লশিং গা পূন্না চৎমীন্নবা এক্সটরনেল টুর ঙরাং চিফ মিনিষ্টর য়ূম্নাম খেমচান্দনা লমথাখ্রে।
অমজুগী মেম্বর ওইনা লৈরিবা মনিপুরদগী পাউমী ২৫ অমদি দি আই পি আর গী ওফিসিয়ল ৫ থারগা পূন্না মীওই ৩০ না শাবা টিম অদূ ভিয়েতনাম গীদমক ঙরাং ইম্ফালদগী খোঙশানখিবনি। ইম্ফালগী শীংজমৈ য়ূম্নাম লৈকায় লাইরেম্বী লম্পাক্তগী চিফ মিনিষ্টর য়ূম্নাম খেমচান্দনা লমথাখি।
খোঙচৎ অদূগী মতাঙদা ফোঙদোক্লদুনা এদিটর্স গিল্ড, মনিপুর( ই জি এম) গী জেনরেল সেক্রেটরি য়ূম্নাম রুপচন্দ্র না ফোঙদোকখিবদা, মীওই ৩০ না শাবা, পাউমীশিংগী খোঙচৎ অদূ দি আই পি আর গী শেন্থং মখাদা পাঙথোকপনি। ভিয়েতনামগী হৌজিক ওইরিবা ইকোনোমি, হিংবগী থাক, করম করম্বা সেক্তরশিংদা দেভলপমেন্টগী প্রোজেক্টশিং হেন্না পায়খৎপা অমদি অতৈ হীরম কয়াদা থিজিন্ননবগী পান্দমদা খোঙচৎ অসি পাঙথোকপনি হায়খি।
ভিয়েতনামগী হীষ্টরিকেল সাইট কয়াদসু চত্তুনা য়েংশিল্লবা মতূং খোঙচৎ অসীগী অৱা-নুঙাই কয়াদু মনিপুরগী মীয়ামদা কূপ্না পাউদমগদবনি হায়খি।
