মনিপুরদা মপান লৈবাকশিংদগী লোন্না,আইনগী ৱাংমদা চঙশীল্লকখিবা মীতোপশিংবু এনী কুকি ট্রাইব হায়বা মমীং থোঞ্জিন্দুনা লৈঙাক্না সেদ্যুল্ড ট্রাইবকি লিষ্ট তা হাপচীল্লুবদগী ইন্দিয়ান কন্সটিট্যুসনগী মখাদা ফোরেন্নরশিং অসিনা খুদোংচাবা কয়ামরূম লৌদুনা লাক্লি। হায়রিবা এনী কুকি ট্রাইবশিং অসি এস টি লিষ্টতগী লৌথোকত্রিবা ফাওবা মনিপুরদা মীকোক থীবগী থবক থৌরম অমত্তা পায়খৎপা য়ারোই হায়না থাদৌ ষ্টুদেন্টস এসোসিয়েসন, থাদৌ ঈনপি মনিপুর অমসুং থাদৌ কম্যুনিটি ইন্টরনেসনেল না পূন্না থাদোরকপা প্রেস ষ্টেটমেন্ট অমদা ফোঙদোরক্লি।
রাজনিটিগী ইথিল চঙদুনা অদূঙৈ ঈং কুমজা ২০০৩ দা এনী কুকি ট্রাইব হায়বা কাঙবূ অসিবু এস টি লিষ্টতা চনশিনখিবনি। অদূম ওইনমক লৈঙাক্না অশোয়বশিং অদূ খঙজরকপদগী কুমশিং ২০১৮, ২০২৩ অমসুং ২০২৪ দা ষ্টেট লৈঙাক্কি কেবিনেট মীফম্না এনী কুকি ট্রাইব অসী এস টি লিষ্টতগী লৌথোক্নবা ৱারেপ লৌবগা লোয়ননা রেজিষ্ট্রার জেনরেল ওফ ইন্দিয়া দা রিকম্মেন্দেসন থাখ্রবনি।
মদূ ঙসিফাওবা নমশীন্দুনা, থবক্তা ওন্থোক্তনা লৈরিবদু য়াবা ঙম্লোই, অথূবা মতমদা এনী কুকি ট্রাইব হায়রিবা কাঙবূ অসী এস টি লিষ্টতগী লৌথোকহন্ননবা লৈঙাক অসিনা তকশীনগদবনি।মদূ থবক্তা ওন্থোক্ট্রিফাওবা এন আর সি অপদেট তৌবা নত্রগা মীকোক থীবনচিংবা অমত্তা পাঙথোকপা য়ারোই হায়না ফোঙদোরক্লি।
