ইম্ফালগী নোর্থ এ ও সি দা লৈরিবা রাজ মেদিসিটি হোস্পিটালগী নর্সিং ইন্সটিট্যুটতা একাদেমিক সেসন ২০২৫-২৬ কি ওইনা অহানবা বেচকি বি এস সি নর্সিং মহৈরোয়শিংগী লেম্প লাইটিং অমদি ওথ টেক্কিংগী থৌরম চৎলিবা থা অসীগী ২০,থাঙজা নুমিত্তা চীঙ-লেম্না পাঙথোকখ্রে।
থৌরমদু প্রিসাইদ তৌখিবা রাজ মেদিসিটি অমদি রাজ মেদিসিটি নর্সিং ইন্সটিট্যুট অসিগী চ্যেরমেন কম মেনেজিং দিরেক্তর ওইনা লৈরিবা হাওবিজম রাজেন্না অনা-লায়েঙগী থবক-থৌরমশিংদা নর্স শিংনা লৌরিবা থৌদাংশিংগী মরুওইবা কয়াদু শীঙথাখিবগা লোয়ননা ইন্সটিট্যুট অসিদা নর্সিং কোর্স চত্থরিবা মহৈরোয় পূম্নমক,মশানা পামজরবদি রাজ মেদিসিটিদা থবক পীগনি হায়বা ৱাফম খঙহনখি।
হোস্পিটাল অসীগী নিপালসুবা মথোলদা লৈরিবা মল্টিপরপজ হোলদা পাঙথোকখিবা চীঙ-লেম্লবা থৌরমদুদা ষ্টেট লৈঙাক্কি ফেমিলি ৱেলফ্যের সর্বিসেসকি দিরেক্তর এন বিনো সিংহ না অথোয়বা মীথূঙলেন ওইনা শরূক য়াখি।মেদিকেল দিরেক্তরেটকি কোল্লেজ ওফ নর্সিংদা প্রিন্সিপাল ওইরিবি দা.এন সুর্বালা দেবি অমদি ট্রেন নর্সেস এসোসিয়েসন ওফ ইন্দিয়া – নোর্থ ঈষ্টর্ন রিজনগী ভাইস প্রসিদেন্ট প্রোফেসর থৌদাম নন্দরানি দেবি অনীনা ঈকায়খুম্নরবা লেঙবীরকপশিং ওইনা শরূক য়ারদুনা ফজরবা পাউতাকশিং,নর্সিংগী মহৈরোয়শিংদা পীরমখি।
মহৈরোয়শিংনা ফ্লোরেন্স নাইটিঙ্গল লেম্প চূখৎখি লোয়ননা বি এস সি নর্সিংগী অহানবা সেমিষ্টর চত্থরিবা মহৈরোয়শিংনা মৈরা চূখৎখি।প্রোফেস্নেল ইথিক্স মতম চূপ্পদা ঙাক্না মীয়ামগী,অনা-অয়েকশিংগী সেবাদা পূক্নীঙ চঙগনি হায়বগী ৱাশকসু মহৈরোষ়শিংনা লৌখি।
