এমজিনারেগাগী মহুৎ জি রাম জি হায়না মিংথোনবা বিল পুথোক্কদৌরি

ভিক্সিট ভারত ২০৪৭ কি পান্দম মপূঙফানা ফংননবা পান্দমদা সেন্টরগী বি জে পিনা লুচিংবা এন দি এ লৈঙাক্না হৌজিক চত্থরিবা পারলিয়ামেন্টকি নিংথম মীফমদা মহাত্মা গান্ধি নেস্নেল রুরেল ইমপ্লোইমেন্ট জেনরেসন স্কিম ( এমজিএনআর ইজিএস) হায়না খঙনরিবা, লৈবাক অসীগী লায়রবা মীয়ামদা চহী অমদা নুমিৎ চাম্মা থবক পীবগী স্কিম অসী নৌনা মমীং হোংদোক্ননবা বিল পুথোক্কদৌরি।বিল অসী পাস তৌনবগীদমক বি জে পিগী এম পি খূদীঙমক চিত্থদনা পার্লিয়ামেন্টগী মীফমদা শরূক য়াহন্ননবা হ্বিপ ইস্যু তৌখ্রে।
এম জি এন আর ই জি এস হায়রিবা,য়ূ পি এ লৈঙাক্না অদূঙৈ কুমশিং ২০০৫ দা হৌদোকখিবা স্কিম অসী সেন্টরদা বি জে পি লৈঙাক লাকখ্রবা মতূঙদা ঙসীদি ভি ভিক্সিট ভারত গরেন্টি ফোর রোজগার এন্দ অজিভিকা মিসন (গ্ৰামিন) হায়বদি অশম্বীদা ভি বি জি রামজি হায়না নৌনা মমীঙ ওন্থোক্নবা থৌরাং তৌরকপনি।অনৌবা থৌরাং অসিগী মখাদা হান্না চহী অমদা নুমিৎ চাম্মা লায়রবা মীয়ামদা থবক পীরম্বদু ঙসীদি চহী অমদা নুমিৎ ১২৫ মীয়ামদা থবক পীননবা পান্দম থম্লি।মীয়াম্না থবক শূবা হেক লোইরবা মতূঙ থেঙলবদা নুমিৎ ১৫ নি ফাওবগী মনূঙদা খূৎশূমল খূদীঙমক পীথোক্কনি হায়না বিল অসীদা পল্লি।হায়রিবা নুমিৎ ১৫ নি অসীগী মনূঙদা খূৎশূমল অদূ পীথোকপা ঙমদ্রবদি অন-এমপ্লোইমেন্ট এল্লাৱেন্স ফংহনবগী ৱাফমসু য়াওরি।
স্কিম অসী কেটাগোরি মরি থোক্না খায়দোক্লগনি।মখোয় অদূদি,ৱাটর সেক্যুরিটি,রুরেল ইনফ্রাষ্ট্রকচর,লাইবলিহুদ ইনফ্রাষ্ট্রকচর অমসুং দিজাষ্টর রেসিলিয়েন্স হায়বসিনি।সেন্টরনা চাদা ৬০ অদুগা ষ্টেটনা চাদা ৪০ পুথোক্তুনা স্কিম অসী পায়খৎলগনি অদুবু হিমালয়ান অমদি নোর্থ ইষ্ট ষ্টেট শিংগী ওইনদি সেন্টরনা চাদা ৯০ অদুগা ষ্টেট না চাদা ১০ পুথোক্লগা থবক পায়খৎকনি হায়রি।