১৯২ শুবা নেস্নেল রিকন্সোলিদেসন মন্থ ইম্ফালদা হৌদোকখ্রে

মনিপুরগী মতম অমগী নিংথৌ গম্ভির সিংহনা ঈরমদম কন্ননবা লৌখিবা থৌদাং কয়াবু নীঙশীংদুনা লমদমসিদা চহী খূদীংগী পাঙথোক্তুনা লাক্লিবা নেস্নেল রিকন্সোলিদেসন মন্থ কি ১৯২ শুবা থৌরম অমা ঙরাং ইম্ফালদা লৈরিবা মনিপুর প্রেস ক্লবতা হৌদোকখ্রে। শেংলবা লাইফম্লেন অমা ওইনা লৈরিবা কংলাদগী মৈরা লৌরগা হৌদোকখিবা থৌরমদু য়ু পি এফ মনিপুরগী থৌমীশিংনা শীন্দুনা পাঙথোকখিবনি। য়ূ পি এফকি প্রেসিদেন্ট নোংথোম্বম রুপচন্দ্রনা থৌরমদু হৌদোকগী ৱাফম ফোঙদোক্লদুনা হায়,লমদমসিদা লৈমিন্নরিবা ঐখোয় কাঙলূপ মশেলগী ঈচীল-ইনাওশিংগী মরক্তা তোখাই তানিংবগী ৱাখল্লোশশিং থাদোক্নদুনা পূন্সীন্ননবা ৱারেপ লৌমিন্নবা মথৌ তাই।

পূন্সীন্ননবা ঙমদ্রিমখৈ শান্তি পুরকপা ঙমখিরোই,চাওখৎপা লমদম অমা ওইহনবসু য়াখিরোই। ৱাখল্লোন অসীনা মাঙদা থম্লগা য়ূপিএফ না চীঙ-তম অনীদা লৈমিন্নরিবা ফূরূপশিংগী মরক্তা লৈনরিবা য়ানদবা,ভাব তানদবশিং ৱাখল তামিন্নহল্লগা অমূক হন্না পূন্সীন্ননবা য়ূপিএফ না থবক পায়খৎপা হৌরে।হীরম অসীগা মরী লৈননা তোঙান তোঙানবা মফমশিংদা ষ্ট্রিট কোর্নর মীফমশিং,মীয়াম অমূক হন্না মীকপ থোক্তুনা ৱাখল তামিন্নবগী থৌরমশিং অমসুং সোসিয়েল সার্বিসকি থৌরমশিং পাঙথোকতুনা লাক্লি হায়খি।

চৎলিবা দিসেম্বর ১৬ তগী অৱাং-নোংপোকলম ওইরিবা অসাম,মেঘালয়া,ত্রিপুরানচিংবা মফমশিংদা চত্তুনা মফমশিং অদূদা লৈরিবা ঈচীল -ঈনাও ওইবশিংগা ৱাখল তামিন্নবা অমসুং খোমজীন-তাশীন্নবগী থৌরমশিং পাক-সন্না পাঙথোক্লগনি।মদূগী মতূঙ মথঙ চহী ২০২৬ কি জনুৱারি ৭তগী মনিপুরদা মীয়াম পূন্সীন্ননবা,নুংশিননা হিংমিন্নবগী পান্দমদা দিষ্ট্রিক্ট পূম্নমক্তা শীন্থুংনা বাইক রেল্লি পাঙথোক্লবা মতূঙদা কাঞ্চিপুরদা লৈরিবা মহারাজ গম্ভির সিংহনা অরোয়বা য়াহীপ তানখিবা খুভমদা থৌরম অদূ লোইশিনগনি হা‌য়না রুপচন্দ্রনা ফোঙদোকখি।