কংগ্রেসনা খ্বায়দগী পামজবা পি আর মনূঙদা রাজবারি থুগাইখিবনি, খ্বায়দগী মচীন থীবা পার্টিদি কংগ্রেসনি :সুসিন্দ্রো

কংগ্রেস হায়রিবা পোলিটিকেল পার্টি অসীদি খ্বায়দগী মচীন থীবা পার্টিনি। মখোয়না ভোৎ হুরানবা, মীয়ামদা নমথাক তৌবা হৌদোক্লম্লগা বি জে পিদা ওন্সীন্দুনা ভোৎ চোর, গদ্দি সোর কেম্পেইন তৌরিবসি মীয়াম্না নমথাক্নি হায়বদু তশেং-তশেংনা খঙঙি হায়বসি মখোয়সু খঙজরিবনি।কংগ্রেসনা খ্বায়দগী পামজবা প্রসিদেন্ট রুল মনুঙদা শিল্লোংদা লৈবা মনিপুরগী রাজবারি উফুল তানা থুগাইরিবসি মীয়াম্না খন্থবিয়ু। হূরানবনা মখোয়না হৌদোকচরগা মীয়ামদা ঊৎ চাইশিন্দুনা বি জে পিদা মরাল থঙজীন্ননবা হোৎনরি।

কংগ্রেসনা পৱার পায়দুনা লৈবা য়াননবা চীঙগী শরূকশিংদা অরানবা মওংদা ভোটর কয়ামরুম হাপচীনখিবনি হায়বসি নৌহৌননা হায়রুদ্রবসু মনিপুরগী মীয়াম্না হেন্দোক-থোইদোক্না খঙনরবা অমনি হায়না খুরায় কেন্দ্রগী এম এল এ লৈশাংথেম সুসিন্দ্রোনা ফোঙদোকখ্রে।ইম্ফাল ইষ্ট দিষ্ট্রিক্টকি খূরায় সাজোর লৈকায়দা লৈবা ঈমা লাই খূলেম্বীগী শঙলেন্দা পাঙথোকখিবা অহূমশুবা শিন্তাকপুরেল নীংশীং মনা-২০২৫ য়েন্থোকপগী থৌরমদা এম এল এনা ৱাফম অসী ফোঙদোকখিবনি। মহাক্না মখাতানা হায়, হৌজিক মনিপুরদা থোক্লিবা পামদবা হীঙশাগী ঈরাং অসীসু ভোৎ হূরানবা কংগ্রেসনা থোকহনবনি।

মখোয়না শাংলবা চহী কয়া শক্তি পায়রিঙৈদা মখাতানা শক্তি পায়ননবা হোৎনবদা চীঙগী শরূকশিংদা অরানবা মওংদা ভোটর কয়ামরুম পাক-সন্না হাপচীনখি। ফোরেন্নর কয়া খোমজীন্দুনা, তুংগী পোইরৈ য়েংহৌদনা ভোটর ওইনা হাপচীল্লুবদগী কৈ মচা চাউনবা হোৎনরুবদা ঙসীদি মনিপুরি য়েলহৌমীশিংদা ওন্সীন্দুনা খোৎলকপনি হায়খি।কংগ্রেসনা হৌদোরক্লিবা ভোৎ চোর গী থীওরি অসিদি সুপ্রিম কোর্টনসু মৱা লৌখিদ্রবনি হায়বা ৱাফম মহাক্না ফোঙদোকখি। বি জে পিদি ঙরাংখক মনিপুরদা চঙলকপনি। চহী লীশাঙ শীৎনা হুরানবগী থবক চত্থরক্লিবসি কংগ্রেস নত্তনা কনা ওইরুগদগে হায়বদু মীয়াম্না খন্থবিয়ু হায়না সুসিন্দ্রোনা মখা তাখি।