মনিপুরদা দেঙ্গী লায়না গী কেস মশীং লেপ্পা লৈতনা হেঙ্গৎলক্লি, অপূনবা পোজিটিব কেস মশীং ২৪৮৫ য়ৌশিল্লক্লে

ষ্টেট অসিদা দেঙ্গী লায়না-লাইচৎ অকীবা মওং অমদা হেঙ্গৎলকপা লেপত্রি। হৌখিবা পূঙ ২৪ অসিদা ষ্টেট অসিদা মীওই ৪২ দেঙ্গী পোজিটিব ওইরকপা থেংনখ্রে। মসী থারগা চহী অসীগী ওইনা ষ্টেট অসিদা অপূনবা দেঙ্গী পোজিটিব কেস মশীং ২৪৮৫ য়ৌরে। দিরেক্তরেট ওফ হেল্থ সার্বিসেস মনিপুরনা থাদোরকপা রিপোর্ট অমগী মতূঙ ইন্না হৌখিবা কুমশিং ২০২৩ দা ষ্টেট অসিদা অপূনবা দেঙ্গী লায়না-লাইচৎ কি পোজিটিব কেস মশীং অসী ২৫৪৮ ওইদুনা খ্বায়দগী য়াম্বা ওইখি। মমাঙগী চহী ২০২৪ দসু মসীগা মান্নবা মশীঙমক য়ৌদ্রবসু কেস মশীং য়ামখি অদুবু চৎলিবা চহী ২০২৫ অসিদদি হৌজিক ফাওবদা হেঙ্গৎলক্লিবা পোজিটিবকি রেট অসীদা মখা চত্থরক্লবদি মমাঙগী হেঙ্গৎলকখিবা কেস পূম্নমক্কি রেকোর্দশিং থুগাইরক্লগনি হায়না পানরি।

ইম্ফাল ৱেষ্ট দিষ্ট্রিক্ট অসী দেঙ্গী লায়না-লাইচৎনা কা হেন্না শোকহল্লবা দিষ্ট্রিক্ট অমা ওইরি। দিষ্ট্রিক্ট অসীদা হৌখিবা পূঙ ২৪ অসিদা দেঙ্গী পোজিটিব কেস মশীং ২৫ ওইখ্রে। মসী থারবদি দিষ্ট্রিক্ট অসীদা হন্দক চহীগী ওইনা অপূনবা দেঙ্গী পোজিটিব কেস মশীং ১৭১৭ য়ৌখ্রে। ইম্ফাল ইষ্ট দিষ্ট্রিক্টকি ওইনা হৌখিবা পূঙ ২৪ দা পোজিটিব কেস মশীং ১৪ নি অদুগা চহী অসীগী ওইনা হৌজিক ফাওবদা অপূনবা দেঙ্গী পোজিটিব কেস মশীংনা ৩৭৩ ওইরি।

থৌবালদা, হায়রিবা পূঙ ২৪ গী মতমসিদা কেস মশীং শুপ্নগী ১খক থেংনখ্রে অদুগা চহী অসীগী ওইনা লৈরিবা কেস মশীংনা ৬৩ শুখ্রে। মতৌ অসূম্না বিষ্ণুপুর দিষ্ট্রিক্টকিসু পূঙ ২৪ অসিদা দেঙ্গী পোজিটিব কেস মশীং ২ ওইখিবগা লোয়ননা মসী থারগা চহী অসীগী ওইনা লৈরিবা কেস মশীং ৬৯ শুখ্রে।