মীয়ামগী লুচিংবা, লময়ানবা ইরাবোৎকি ১২৯ শুবা মপোক কুম্মোন থৌরম পাঙথোক্নখ্রে

হৌখিবা সেপ্তেম্বর ৩০ দা মনিপুরগী মপান্দা, তোঙান-তোঙানবা মফমশিংদা চোইনা খুন্দা- লৈতাদুনা লৈখ্রবা মনিপুরি দায়স্পোরাশিং য়াওনা ষ্টেট অসীগী মফম কয়াদা মীয়াম্না লময়ানবা হিজম ইরাবোৎকি ১২৯ শুবা মপোক কুম্মোন থৌরম পাক-সন্না পাঙথোক্নখ্রে।মপূঙ ওইবা থৌরমদি মনিপুর লৈঙাক্না শীন্দুনা ইম্ফালগী থাংমৈবন্দ লিলাশিং খোংনাংখোংদা লৈরিবা ইরাবোৎ স্কৱারদা পাঙথোকখি। মনিপুরগী গভর্নর অজয় কুমার ভাল্লানা লুচিংদুনা মীয়াম্না লময়ানবা ইরাবোৎকি মিতমদা হৈরাং- লৈরাংশিং কত্তুনা ঈকায়খুম্নবা ঊৎখি।
থৌরমদুদা হান্নগী চিফ মিনিষ্টর নোংথোম্বম বিরেন, মনিপুর লেজিসলেটিব এসেমব্লিগী স্পিকর থোকচোম সৈত্যব্রত্তা, রাজ্য সভা অমদি লোক সভাগী এমপিশিং, এম এল এশিং, চিফ সেক্রেটরি, দি জি পি, সিভিল অমদি পুলিসকি মকোকথোংবা ওফিসিয়েলশিংসু শরুক য়াখি। থৌরমদুদা ৱা ঙাঙলদুনা মনিপুরগী হান্নগী চিফ মিনিষ্টর নোংথোম্বম বিরেন না হায়, মহাক্না লৈঙাক পায়রিঙৈ মতমদা লময়ানবা ইরাবোৎকি মিতম অসি শাখিবনি। লুচিংবা অসীগী মিতম লৈরিবসিগী মনাক্তা লৈরিবা পূখ্রী অসীগী মনাক্তা অচৌবা ষ্টেজ অমা শাহন্ননবা গভর্নরদা তকশীল্লি। অথূবা মতমদা থবক ওইনা পায়খৎলক্লগনি হায়খি।
নাকল অমরোমদা, ত্রিপুরাগী মনিপুরি সাহিত্য পরিষদনা আগরতালা ম্যুনিসিপাল কোরপোরেসনগা খূৎসম্নরগা ধালেশ্বরগী কল্যানিদা লৈবা ট্রাই-জঙ্কসন্দা লমজীঙবা ইরাবোৎকি ১২৯ শুবা মপোক কুম্মোন থৌরম পাঙথোকখি।
তোঙান-তোঙানবা ক্লব, এসোসিয়েসন অমসুং সিভিল সোসাইটি ওরগনাইজেসনশিংনসু লময়ানবা ইরাবোৎকি ১২৯ শুবা মপোক কুম্মোন থৌরমশিং পাক- সন্না পাঙথোক্নখি।