ওন্ট্রপ্রিন্যরশিংনা মীয়ামগী হিংনবা লম্বী পীবগী মথক্তা খুন্নাইগী শেল- থুমগী ফীভম ফগৎহনবদা চাউনা মতেং পাংলিবনি:গভর্নর

ঐখোয়গী লমদমসিদা মশানা মশাবু থবক পীজবখক্তা নত্তনা থবক ফংদ্রিবা অতৈ মীওই কয়াবুসু থবক পীদূনা হিংননবগী লম্বী পীরিবা ওন্ট্রপ্রিন্যরশিং অসীনা খুন্নাইগী অমসুং লৈবাক্কি শেল- থুমগী ফীভম ফগৎহনবদা অচৌবা থৌদাংশিং লৌদুনা লাক্লিবনি হায়না মনিপুরগী গভর্নর অজয় কুমার ভাল্লানা শীঙথাখ্রে। ঙরাং ইম্ফাল হোটেলগী সঙাই হোলদা পাঙথোকখিবা শক্নায়রবা ওন্ট্রপ্রিন্যর খরদা তোঙান-তোঙানবা মখলগী এৱার্দশিং পীদুনা পূক্নিং থৌগৎপগা লোয়ননা ঈকায়খুম্নখিবা থৌরমদা অথোয়বা মীথূঙলেন ওইনা শরূক য়াখিবা গভর্নরনা মহাক্কি ৱাফম অসী ফোঙদোকখিবনি।

থৌরমদুদা গভর্নর্স বেষ্ট ওন্ট্রপ্রিন্যরশিপ এৱার্দ অমসুং ওল মনিপুর ওন্ট্রপ্রিন্যর আউটষ্টেন্দিং এৱার্দ, ২০২৫ য়েন্থোকখি। দিরেক্তরেট ওফ টেক্সটাইলস, কম্মর্স এন্দ ইন্দষ্ট্রিজ অমসুং ওল মনিপুর ওন্ট্রপ্রিন্যর এসোসিয়েসন না পূন্না শীন্দুনা পাঙথোকখিবা এৱার্দ য়েন্থোকপগী থৌরমদুদা মনিপুর লৈঙাক্কি এদ্দিস্নেল চিফ সেক্রেটরি অনুরাগ বাজপায়ি, ওল মনিপুর ওন্ট্রপ্রিন্যর এসোসিয়েসনগী প্রসিদেন্ট শৌগাইজম রিসিকুমারনচিংবনা প্রেসিদিয়ম মেম্বরশিং ওইনা শরুক য়াখি। থৌরম অদুদা গভর্নরনা বাবিনা গ্ৰুপ ওফ ইন্দষ্ট্রিজ গী মেনেজিং দিরেক্তর অমসুং চ্যেরমেন ওইরিবা থাংজম ধবল্লিদা বেষ্ট ওন্ট্রপ্রিন্যর এৱার্দ খূৎশিন্নখি।

এ এম ই এ আউটষ্টেন্দিং এৱার্দ না মৈরা ফুদস কি প্রোপ্রাইটর হঞ্জবম সুব্রা দেবিদা, বেষ্ট এক্সপোর্ট এৱার্দ না সেন্দ এন্দ ষ্টোন মেদিকেল দিভাইসেস প্রাইভেট লিমিটেডকি ফাউন্দর ঙাঙবম প্রেমজিৎতা পীখি। বেষ্ট ষ্টার্ট অপ এৱার্দনা গ্ৰিন বাইওটেক কি কো-ফাউন্দর দা. আসেম সুন্দরিদা, বেষ্ট ইন্নোভেটিব এৱার্দ না ফুদ ৱায়-ফায়গী ফাউন্দর কে বিকিচান্দদা, বেষ্ট এজেন্সি এৱার্দ না নেদফিগী মেনেজিং দিরেক্তর পি ভি এস এল এম মুর্টিদা পীখি। বেষ্ট প্রোমিজিং এৱার্দ না মোইরাংথেম মুক্তামনিদা পীখি।