সেক্যুরিটি ফোর্সকি কম্বাইন টিম অমনা অকক্নবা পাউগী লীখূন অমা ফংবদগী সর্স ওপরেসন চত্থবদা কংলৈপাক কম্যুনিস্ট পার্টি (কে সি পি) পিপলস ৱার গ্ৰুপকি এক্টিব কাদর অহূম ফাগৎপা ঙমখ্রে।
ফাগৎখ্রবশিং অদুদি ইম্ফাল ইষ্ট দিষ্ট্রিক্টকি মনূঙচন্না লৈরিবা খাবৈসোয় মনীং লৈকায়দগী মোহম্মদ সাগির (২৮) , ঊখ্রূল দিষ্ট্রিক্ট কি খাংখুই খূনৌদগী থানশোক অৱুংশি শিমরে (৩৭) অমসুং ইম্ফাল ইষ্ট দিষ্ট্রিক্টকি খূরায় তোপ খোংনাং মখোঙদগী ওইনাম অমিটকুমার (২৮) হায়রিবা অহুম অসিনি।
মখোয়না হায়দোরকপগী মতূঙ ইন্না কম্বাইন টিম অদূনা নোংপোক কৈথেলমানবিদগী য়াম্লবা খূৎলায়শিং ফাগৎপসু ঙমখ্রে। খূৎলায়শিং অদূদি এম সিক্সটিন রাইফল অমা, ইন্সাস রাইফল মঙা, এস এল আর রাইফল অহুম, থ্রী নোট থ্রী রাইফল অনী, তোঙান-তোঙানবা কেলিবরগী নোংমৈ মরূ রাউন্দ ৩৮২ অমসুং তোঙান-তোঙানবা খূৎলায়শিংগী মেগজিন ২৬ নি হায়না পুলিসকি পাউ অমনা ফোঙদোরক্লি।
