হোম এফ্যের্স মিনিষ্ট্রিনা সূ কাঙবূগা ঙসী দিল্লিদা ৱারী শানরগনি

হৌজিক মনিপুরদা থোক্লিবা হীঙশাগী ঈরাং অসী লোইশিন্ননবা পান্দমদা মিনিষ্ট্রি ওফ হোম এফ্যের্স না সস্পেন্সন ওফ ওপরেসন (সূ) সাইন তৌনদুনা লৈরিবা চীন-কুকি লালহৌলূপ অনীগা ঙসী ন্যু দিল্লিদা ৱারী শাননবা থৌরাং তৌবা লোইখ্রে। থাজবা য়াবা ছোর্স অমনা ফোঙদোরকপা মতূঙ ইন্না, য়ুনাইটেদ পিপলস ফ্রন্ট অমসুং কুকি নেস্নেল ওরগনাইজেসনগী কাঙবূশিং হোম এফ্যের্স মিনিষ্ট্রিনা খঙহল্লকখিবগী মতূঙ ইন্না হান্ননা ন্যু দিল্লিদা থুংখিবগা লোয়ননা ৱারী শাননবগীদমক কেম্প তৌদুনা লৈখ্রবনি হায়রি। লালহৌবশিং অসীগা ৱারী শানদ্রিঙৈ মাঙোইননা কুকি- জো কাঙলূপকি সিভিল সোসাইটি ওরগনাইজেসনশিংগা ৱারী শাননবা মিনিষ্ট্রিগী মায়কৈদগী থৌরাং তৌরি।

সূ দা লৈরিবা লালহৌবশিংগা ৱারী শানগদৌরিবা অসীদা হোম মিনিষ্ট্রিনা মনিপুরগী নেস্নেল হায়ৱেশিংদা ফ্রী মূভমেন্ট য়াহন্ননবা অকনবা ৱাফম ফোঙদোক্লবা য়াই হায়বগী থাজবা লৈরি। মতম শাংনা সূ এগ্ৰিমেন্ট শাংদোক্নবগী মতাঙদা নৌনা খূৎয়েক পীনদনা লাক্লিবা অসিগী মতাঙদসু মিনিষ্ট্রি অসীগী মীহুৎ কাঙবূগা সূ দা লৈরিবা কাঙবূশিং অসীগা মমাঙদা কয়ারক ৱারী শানখিবা লৈখ্রবনি। অদূম ওইনমক হৌজিক ফাওবা নাখৈ শেংনা,  ৱারোয়শিন পুরকপা ঙমদনা লাক্লিবনি।

ঙসী ৱারী শান্নগদৌরিবা অসীদা হোম মিনিষ্ট্রিনা হান্নদগী খঙহনখ্রবা, সূ মিলিটেন্টশিংগী হৌজিক মনিপুরদা লৈরিবা দেজিগনেটেদ কেম্প ১৪ অসী ৭ তা হন্থহন্ননবা, মৈতৈশিংনা খুন্দারিবা মফম মনাক্তগী সূগী দেজিগনেটেদ কেম্প হোংদোকপগী ৱাফমশিংদু থবক্তা ওন্থোক্ননবগী মরমদসু মিনিষ্ট্রিনা তকশীনগনি হায়রি।মসীগা লোয়ননা নেস্নেল হায়ৱে মনাক্তা সূ গী দেজিগনেটেদ কেম্প থমদনবা ৱাফমশিং মিনিষ্ট্রিনা পুখৎকনি হায়বগী থাজবা লৈরি হায়রি।