জিল্লা পরিষদ, গ্ৰাম পঞ্চায়েত কি মীখল থা তরূক্কি মনূঙদা পাঙথোক্ননবা হায় কোর্ট ওফ মনিপুরনা দিরেক্তিব পীখ্রে

মতম শাংনা নমশীন্দুনা, পাঙথোক্তনা লাকখ্রবা গ্ৰাম পঞ্চায়েত অমসুং জীল্লা পরিষদকি মীখল লাক্লিবা থা তরুক্কি মনূঙদা পাঙথোক্ননবা হায় কোর্ট ওফ মনিপুরনা খঙহনখ্রে।মনিপুর লৈঙাক্না ওর্দর অমা হৌখিবা কুমশিং ২০২৪ গী ফেব্রুয়ারি ২৯ দা থোক্তুনা পঞ্চায়েত অমসুং জীল্লা পরিষদকি মীখল পাঙথোক্ট্রিফাওবগী চৈরক্তা পঞ্চায়েত কি এদমিনিষ্ট্রেটিব কম্মিটিশিং অমসুং জীল্লা পরিষদকি এদমিনিষ্ট্রেটরশিং খন্দুনা মথৌশিং পাঙথোকহন্দুনা লাকখিবনি অদুবু মখোয়শিংদু চৎনবা য়াররোই, থা ৬ তগী হেন্না মখোয়গী মথৌ পাঙথোক্নবগী রাইট অমত্তা লৈতে হায়রদুনা চৎনহনখিদ্রে।
হায় কোর্ট ওফ মনিপুরগী চিফ জষ্টিস কেম্পায়া সোমাসেকরগী বেঞ্চনা ঙরাং পীখিবা দিরেক্তিব মতূঙ ইন্না হান্নদগী লৈরকখিবা গ্ৰাম পঞ্চায়েতকি এদমিনিষ্ট্রেটিব কম্মিটিশিং অমসুং জীল্লা পরিষদকি এদমিনিষ্ট্রেটরশিং মূত্থৎলে হায়না খঙহনখিবনি। মসিগী মতাঙদা ষ্টেট লৈঙাক্না থোকখিবা ইন্টরিম ওর্দর অদূসু চৎনহনখিদ্রে।

কেস অসীদা আপেল্লেন্ট ওইখিবশিংগী মনূঙদা ষ্টেট লৈঙাক্কি আর দি এন্দ পি আরগী কম্মিস্নার, মসীগী দিরেক্তর, থৌবাল, বিষ্ণুপুর, ইম্ফাল ৱেষ্ট, ইম্ফাল ইষ্ট, জিরিবাম অমসুং ককচীঙ দিষ্ট্রিক্ট শিংগী দিপ্যুটি কম্মিস্নারশিং, ক্বাকৈথেল লাইশ্রম লৈকায়দগী মুতুম বোরেন, ক্বাকৈথেল কোঞ্জেং লৈকায়দগী কোঞ্জেংবম জয়েন্ত নচিংবা মীওই ১৫ য়াওরি।কেস অসীগী রেস্পোন্দেন্ট ওইরিবনা চরাংপাৎ মমাঙ লৈকায়দগী ফৈরোইজম হেরামনি, চরাংপাৎ ময়ায় লৈকায়দগী শোরোখাইবম ইমো, তেন্থা খূঞ্জাও নাউরেম লৈকায়দগী নাউরেম প্রদিপ, মোইরাংকম্পু ময়ায় লৈকায়দগী লৌরেম্বম রামেশ্বরনচিংবনি হায়রি।