ইম্ফাল ইষ্ট, ইম্ফাল ৱেষ্ট দিষ্ট্রিক্টশিং য়াওনা তম্পাক অমসুং চীঙগী মফম কয়াদা মনিপুরগী লম্বী অয়াম্বগী ফিভম অসূক্কি মতীক ফত্তবগী থাক্তা লৈদুনা মীওইবনা চৎপা য়াবা লম্বী ওইরক্তবগী মওংদা লৈরক্লিবসিদগী কোকহন্ননবা হায়দুনা মনিপুর লৈঙাক্কি মায়কৈদগী ৱার্ক ওর্দর পীখিবা থা ১০ হেল্লবা ফাওবসিদা লম্বী শেমদবগী মরম খূদক্তা পীরক্ননবা ষ্টেট লৈঙাক্কি পি দব্লিয়ু দিনা কম্পেনি অনীদা সো কোজ নোটিস থাখ্রে।
ৱার্ক ওর্দর লৌখ্রবা মতূঙ থা তরা হেল্লবা ফাওবসিদা লম্বী শেমদনা তূমিন্না লৈশিনখ্রবা কন্সট্রক্সন কম্পেনি অনী অদুদি কি-ষ্টোন প্রাইভেট লিমিটেড অমদি অমির কন্সট্রক্সন প্রাইভেট লিমিটেড হায়রিবশিং অসীনি।
মতম শাংনা তুমীন্না লৈশিনখিবগী মরম্না ষ্টেট লৈঙাক্কি পি দব্লিয়ু দিনা নৌনা শেনফম কাইথোক্তুনা লম্বীশিং অসী শেম্বা য়াবগী ওইথোকপসু লৈহন্দ্রে হায়রি। লম্বী শেম্লক্ট্রিবগী মরম হংলুরবসু হৌজিক অসী নোংজু পান্থা মতম ওইবনা বিটুমেন য়াওনা অতৈ মেটরিয়েলশিং পুশিল্লক্ননবা হোৎনবদা খুদোংচাদবা কয়ামরুম মায়োক্নরগা লৈরি হায়না পাউখুম পী হায়রি। কম্পেনি অনী অসীগী মরম চাদবা পাউখূমশিংদুদা পেন্দ্রবা ষ্টেট অথোরিটিনা সো কোজ নোটিস থাদুনা অকক্নবা মতমগী মনূঙদা পাউখূম পীরক্ট্রবদি এগ্ৰিমেন্ট অদূদগী ৱিথদ্রো তৌরগনি হায়বা ৱাফম খঙহনখ্রে হায়রি।
চৈরকশিদা কেন্দ্র খরগী এম এল এশিংগা নক্নবা মীওই খরনা সিমেন্ট কনক্রিট শীজীন্নদুনা শেমগদৌরিবা অনৌবা লম্বীশিং অসি মখোয়না শেমগনি, কম্পেনি অনী অসীনা থবক শূবা য়ারোই, কম্পেনিশিং অসী চঙলকপা য়ারোই হায়না খঙহল্লকপসু লৈ হায়না চীনবূঙ-চীন্থাঙ ওইনা মীয়াম্না ঙাঙনবসু লৈরি।অসীগুম্বা ৱাফম অসী কদায়ফাওবা চুম্লবগে হায়বদুসু অথোরিটিনা থিগৎহন্নিংবগী অপাম্বা মীয়ামদা লৈনরি। এসিয়ান ইনফ্রাষ্ট্রকচর ইনভেষ্টমেন্ট বেঙ্ক ( এ আই আই বি) না অহানবগী ওইনা কিলোমিটর ৫৪০ শাংবা লম্বী সিমেন্ট কনক্রিট শীজীন্নদুনা শেম্বগা লোয়ননা দ্রেন য়াওনা শেম্ননবা লূপা ক্রোর ৩,৬৪০ সু কাইথোকখ্রবনি হায়না পাউ অসীনা মখা তারি।
