প্রাইম মিনিষ্টর মোদিগী থবক থৌরমশিং মীয়াম্না থাগৎফম থোকই, থবক শূবদা ঈকায়নিঙায় লৈতে :তোম্বা

ঈশানা অপাম্বা থবক শুদুনা ঈমূঙ-মনূঙ থাক্ননবা, ঈচা-ঈশুগী অৱাবা কন্ননবা হোৎনবদা ঈকায়নিঙায় লৈতে। হুরাল্লগা ঈচা- ঈশু থাকপগী মহুৎ হুমাং তানা থবক শুরগা ঈনীং তম্না, কনাগীসু মতেং লৌরুদনা হিংবা তমগদবনি হায়না ফাউন্দেসন ফোর রুরেল অর্বান দেভলপমেন্ট মনিপুরগী প্রসিদেন্ট এল তোম্বনা ফোঙদোরক্লি। প্রাইম মিনিষ্টর নরেন্দ্র মোদিনা লৈবাক অসীগী মীয়ামগী নুঙাই- য়াইফনবা লৌখৎলক্লিবা থবক-থৌরমশিং অসী য়াম্না শীঙথানিঙায়নি, মমাঙদা চৎখ্রবা অতৈ প্রাইম মিনিষ্টর শিংগা মান্নদবা মওংদা নরেন্দ্র মোদিনা লৈবাক অসীগী মীয়ামগী নুঙাই-য়াইফনবা পায়খৎলক্লিবা থবকশিং অসী ঐখোয়না থাগৎফম থোকপনি হায়না তোম্বনা শীঙথাখি। ঐখোয়না হুমাং তানা থবক শূরগা ঈশাগী ঈমূঙ-মনূঙ থাকপদা ঈকায়নিঙায় অমত্তা লৈতে। মীগী মপোৎ-মরল হুরাল্লগা হিংগদৌবগী মহুৎ ঈশাগী হুমাংমলনা হিংবা তম্লসি হায়বা ৱাফম ফোঙদোরক্লি।

ঈনাক কৈরাক খুল্লবনি, পৈশা পায়রবনি হায়দুনা মশাখক্তগী নাপলনা হিংলিবা মীওইশিং অসী য়াম্না তোল্লবশিংনি, লায়রবা মীওইশিংনা মখোয়গী অচৌবা মতেং অমা পাংলিবনি,লায়রবা লৈতনা ঈনাকখুনবা লৈবা য়াদবনি হায়নসু তোম্বনা মরী লৈনবশিংদা অকনবা ৱার্নিং তৌখি। লৈঙাক্না মীয়ামগী ফন্দ নিয়ম চুম্না শীজিন্নগদবনি। হুরানবগী নিতি চত্থরগা সাসন তৌরবদি অফবা লৈঙাক অমা পুরকপা ঙম্লোই, চাওখৎপগী মহুৎ মনীঙ হন্থরক্কনি হায়খি। লৈঙাক্না হৌজিক লম্বী পাকথোকপগী থবক থৌরম পায়খৎলক্লিবসি য়াম্না শীঙথানিঙায়নি অদুম ওইনমক থৌওংসিনা মীওই কয়াগী লন-থুম, য়ূম- কৈ কয়া অমাঙ- অতা থোকহল্লিবসি মমাঙদগী হৌনা চেকশীল-থৌরাং লৌখৎহৌদবগী, ঙাইহাক ঙাইহাক্কি য়েংলগা থবক তৌরকখিবা ময়াম অদুগী ফলনি। মিনিষ্টর, এম এল এ অমসুং প্রধানশিংনা নিয়ম চুম্না ফন্দ শীজিন্নরগা মীয়ামগীদমক থম্মোয় শেংনা থবক পায়খৎপিয়ু। চীঙ-তম অনিমক্তা আইন চপ মান্ননা চৎনহনসি হায়খি।

ঙসিফাওবদা নেস্নেল হায়ৱেশিংদা তম্পাক্কি মৈতৈশিংনা চৎপা য়াহন্দনা লৈরক্লিবসি মতম য়াম্না শাংলক্লে। মনিপুরগী য়েলহৌমী ফূরূপ অমা ওইরিবা মৈতৈশিংনা মশাগী মরমদমদা চৎপদা অথিংবা থম্লিবসি ইন্দিয়াগী প্রাইম মিনিষ্টর অমদি সেন্তর লৈঙাক্না খূদক্তা অকনবা মীৎয়েং চঙবীদুনা লম্বী পূম্নমক অথীং- অরাক অমত্তা য়াওদনা, অকি-  অখঙ লৈতনা চৎপা য়াহনবিয়ু হায়নসু তোম্বনা মরী লৈনবশিংদা আপিল তৌখি।