ইন্দিয়ানা রসিয়াদগী থাউ লৈরগা শীজীন্নবগী থৌওংশিং য়ানিংদবা ঊত্তুনা ইন্দিয়াগী পোৎলমশিং য়ু এসতা পুশিল্লকপদা চাদা ৫০ গী চাং য়ৌনা টারিফ লৌরগনি হায়না য়ু এস প্রসিদেন্ট দোনাল্ড ট্রম্পনা লাউথোরকখ্রে। য়ু এসকি কা হেঞ্জিনবা ৱাফম অদূগী মতাঙদা মতম খরা ৱাফম অমত্তা ফোঙদোক্তনা তূমিন্না লৈরুরবা মতূঙদা, মমাঙদা ইন্দিয়া অমসুং য়ু এস অনীগী মরক্তা সাইন তৌনখিবা দিফেন্স দিল অমা ইন্দিয়ানা সস্পেন্দ তৌরে হায়না ন্যু দিল্লিনা নৌনা ফোঙদোরকখ্রে।
দিফেন্স দিল অসীগী মতূঙ ইন্না ইন্দিয়ানা য়ু এসতগী পি-৮১ ওসিদোন এন্টি-সবমেরিন এয়রক্রাফট ৬ লৈনবা ৱাফম য়ানখিবনি। হৌজিকমক্কি ওইনা ইন্দিয়ান নেভিনা য়ু এসকি পি-৮১ এয়রক্রাফট ১২ শীজীন্নরিবনি। ইন্দিয়ান ওসিন অমসুং অরাবিয়ান সী দা চাইনাগী থবক থৌওং কয়ামরুম হেঙ্গৎলক্তুনা রিজন অসোমদা অকিবা কয়া পীরক্লিবা অসীগী য়েংলগা সেক্যুরিটি অমসুং দিফেন্স কি থবক হেন্না চেকশীন্না পায়খৎননবা পান্দমদা য়ু এসনা শাবা ওসিদোন এন্টি-সবমেরিন এয়রক্রাফট ৬ অদূ লৈননবা দিল অমা য়ু এস প্রসিদেন্ট অমসুং ইন্দিয়ান প্রাইম মিনিষ্টর নরেন্দ্র মোদি অনীগী মরক্তা খূৎয়েক পীনখিবনি।
চৈরকশিদা লাক্লিবা আগষ্ট ৩১ দগী সেপ্তেম্বর ১ ফাওবা পাঙথোক্কদৌরিবা সাংহাই কোওপরেসন ওরগনাইজেসনগী রিজনেল সম্মিট য়াওরুনবগীদমক প্রাইম মিনিষ্টর নরেন্দ্র মোদী থা অসীগী ৩০ দা বৈজিংগীদমক ন্যু দিল্লি থাদোকখ্রগনি হায়রি।চাইনিজ প্রিমিয়র সি জিনপিং অমসুং ইন্দিয়ান প্রাইম মিনিষ্টর নরেন্দ্র মোদী অনীগী মরক্তা মমাঙগী কুমশিং ২০২৪ দসু ব্রিক্স মীফমগী সাইদলাইনদা উনদুনা ৱারী শান্নখিবসু লৈখ্রবনি।
