লৈঙাক্না হন্দক লৌখৎলক্লিবা ইভিক্সন দ্রাইব অসী মপূঙফানা শৌগৎলি, অতৈ অশোয়বশিংসু চুমথোকহন্নিংই: এল তোম্বা

হন্দক ষ্টেট লৈঙাক্কি মায়কৈদগী তোঙান- তোঙানবা দিষ্ট্রিক্ট এদমিনিষ্ট্রেসনশিংগী খূত্থাঙদা লৈঙাক্কি অমদি মীয়ামগী প্রোপর্টি ওইনা লৈরিবা ষ্টেট এরিয়াশিংদা লম খোপচীল্লম্বা মীওইশিংগী মথক্তা ইভিক্সন দ্রাইব চত্থরক্তুনা, মখোয়না আইন কায়না শাজিল্লম্বা য়ূম-কৈ, দুকান, হোটেলনচিংবা কয়ামরুম পাক-সন্না তকথোকপগী থবক চত্থরক্লিবসি মীয়াম অমসুং খুন্নাই অসীগী ওইনদি তুংকোইনা কান্নবা পীগদবা অফবা খোঙথাঙ অমনি। লৈঙাক্কি থৌরাং অসী মপূঙফানা শৌগৎলি হায়না ফাউন্দেসন ফোর রুরেল অর্বান দেভলপমেন্ট, মনিপুরগী প্রসিদেন্ট ওইনা লৈরিবা এল তোম্বনা অপেনবা ফোঙদোরক্লি।

মহাক্না পাউমীশিংদা ফোঙদোরকখিবা মতূঙ ইন্না, হন্দক পায়খৎলক্লিবা লৈঙাক্কি থবক-থৌরমশিং অসী মীয়ামগীদমক য়াম্না অচুম্বা থৌরাং অমনি হায়না লৌই। লমদম অসীদা মানা মানা অনীঙবা অপাম্বা অদুখক্তমক য়েংনদুনা, খুন্নাইগী ইন্টরেষ্ট য়েংদনা কুশি হেক্তা তৌদুনা থবক তৌবা য়াদে, লৈঙাক অমা লৈরি অমসুং লমদমসিদা মীচঙ মীখায় নাইদবা লো অমা চৎনদুনা লৈরি হায়বদু মীয়ামদা খঙহন্ননবা পারা অমা লৈঙাক্না তম্বিরকপসি অপেনবা পোকই হায়খি।

লম খোপচীল্লম্বা মীওইশিংদা পারা তম্বীরিবা অসীগুম্না লমদমসিদা থবক শুনিংদনা অমসুং মীয়ামগী সেবা তৌনিংদনা মশাগী তোলোবখক শোয়দ্রগা লোইরে হায়বগী ৱাখলদা ওফিস কাদনা তোলোব চাননবা হোৎনরিবা, মশাগী কান্নবখক্তা য়েংলগা মীয়ামগী খন্দ্রবা লৈঙাক্কি ওফিসিয়েলশিং অকনবা এক্সন লৌখৎফম থোকই হায়খি। অঙাঙ লাইরিক্তি তম্বিদনা, স্কুলদি কাদনা তোলোব চারিবা ওজাশিং অমদি কাচিন কোয়াশিংদা লৈরিবা অসিগুম্বা মখল খূদীংমক্কি অশোয়বা-অরানবা থবক তৌরিবা ময়ামসি লৈঙাক্না নীঙথীনা য়েংশিন্দুনা চপখৎপিরবা মতূঙদা আইনগী চপচাবা চৈবী-চৈথেং পীবীদুনা লমদমসিদা লৈঙাক অমা লৈরি, আইন চৎনরিবা লমদম অমনি হায়বদুসু খঙহনবিয়ু হায়না প্রসিদেন্ট অসীনা লৈঙাক্কি মীৎয়েং চিংশিল্লক্লি। থবক শুদনা তোলোব চারিবা মীওইশিংদগী তোলোবকি শেনফমশিংদু লৌখৎপিরগা মীয়ামগী ওইনা য়াইফগদবা থবক থৌরমশিংদা থাধবিয়ু। মদূনা তুংকোইনা খুন্নাইগী য়াইফবা ওইগনি হায়রক্লি।