পারলিয়ামেন্টগী নোংজু মীফম হৌখ্রে, মনিপুরদা পোপ্যুলর লৈঙাক আগষ্ট থাদা লৈরগনি হায়রিবদু ওইথোক্লোই: এনালিষ্টশিং

থা অমা চূপ্না, লাক্কদৌরিবা আগষ্ট থাগী ২১ ফাওবা লেপ্তনা চত্থদুনা সিট্টিং ২১ লৈরগদবা লোক সভা অমসুং রাজ্য সভা অনীগী নোংজু মীফম ঙরাংদগী চত্থবা হৌখ্রে। মসীগী নোংমা মাঙওইননা হন্দক্কি সেসন অসী য়ৈখায়-থিঙ্গাইবা অমসুং অপনবা, নুঙাইতবা অমত্তা য়াওদনা নীঙথিনা চত্থবা য়াহন্ননবা পোলিটিকেল পার্টি পূম্নমক্কি মীফম অমা থা অসীগী ২০ দা য়ুনিয়ন হেল্থ মিনিষ্টর জে পি নাদ্দানা চ্যের লৌদুনা পাঙথোকখি। হন্দক্কি সেসন অসিদা আই টিগা মরী লৈনবা বিল অমা য়াওনা তোঙান- তোঙানবা বিল ৮ পুথোক্তুনা পাস তৌননবা থৌরাং তৌরি।

মনিপুরদা প্রসিদেন্ট রুল লৈবগা লোয়ননা ষ্টেট এসেমব্লি এদমিনিষ্ট্রেসন লৈত্রবনা পারলিয়ামেন্টনা মসীগী কন্ট্রোল অমসুং ইন- চার্জ খূদীঙমক পুদুনা লৈরিবা মরম্না ষ্টেৎ অসীগী তোঙান- তোঙানবা বিল কয়াসু হন্দক্কি সেসন অসিদা পারলিয়ামেন্ট সেসন অসিদা পুথোক্কদৌরি। ফাইনান্সিয়েল বিল খরসু মনিপুরগী ওইনা পুথোক্ক দৌরি। সেসন অসিদা মনিপুরদা হৌজিক থম্লিবা পি আর সাসন অসী মখাতানা লাক্কদৌরিবা থা তরুক শাংদোক্নবগী মতাঙদা অতোপ্পা বিল অমসু শোয়দনা পুথোক্তুনা পাস তৌরগনি হায়বগী চপচাবা থাজবা লৈরি। মনিপুরগী মীয়াম্না পি আর থম্বা মখাতানা পামদে হায়রবসু হৌজিকমক্কি ওইনা রুলিং পার্টিগী মরক্তা অপূনবগী শক্তম অমা শাগৎপগী মহূত্তা মাগী মাগী কাঙলূপ খায়দোক্নরগা গ্ৰুপিং শাগৎনরকপগী মওং কয়া লৈনরিবা অসিনা মরম ওইরগা পোপ্যুলর লৈঙাক অমা শেম্বা ঙম্বগী মওং লৈতবনা পি আর মখাতানা থা তরুক শাংদোরক্কনি হায়বসিদা য়েৎননিঙাই ওইদ্রে হায়না লৌবা য়ারে।

চৈরকশিদা লাক্লিবা আগষ্ট থা অসিদা মনিপুরদা শোয়দনা পোপ্যুলর লৈঙাক অমা লাক্লগনি হায়না হন্দক এম এল এ অমনা পীখিবা প্রিদিক্সন অদুমদি য়ূম্ফম য়াওদবা, ওইরোইদবা অমনি হায়না পোলিটিকেল এনালিষ্ট কয়ানা ফোঙদোক্নরক্লি।পনবা য়াবদি, ঙসী মীফমগী অহৌবা নুমিত্তা পহলগাম টেরর এট্টেক অমসুং ওপরেসন শিন্দুরগী মতাঙদা মতম কাইথোক্তুনা খন্নগদবনি হায়বা ওপ্পোজিসন পার্টিশিংগী দাবী হেন্না কনশীল্লকপদগী হাওস অনীমক্কি মীফম হয়েংফাওবা য়ৈথোকখি।