স্মার্ট সিটি মিসনগী মখাদা য়াম্লবা শেনফম থাধরগা খিনখিবা ট্রাফিক সিগনেল লাইট ১৫ গী মনূঙদা হৌজিক ৬ খক মথৌ তৌদুনা লৈরি

মনিপুর লৈঙাক্না লমদম অসীগী মীয়ামগী চাওখৎহন্ননবা অমসুং য়াইফা থৌরাংগা মরী লৈননা পায়খৎলকখিবা থবক নত্রগা প্রোজেক্ট অয়াম্বা মসীমদি মপূঙফানা মীয়ামদা কান্নবা পীবা ঙম্লে, খুদোংচাবা নীংথীনা ফংহনবা ঙম্লে হায়বসী ঈয়াও য়াওদবগী মওং অমদা অদূম্মক লৈরক্লি। চহী কয়াগী মমাঙদা ইম্ফাল সিটি অমদি গ্ৰেটর ইম্ফালগী তোঙান তোঙানবা মফমশিংদা ট্রাফিক সিগনেল লাইট কয়ামরুম ইন্সটোল তৌখি। অদূম ওইনমক থা ফাদ্রিঙৈদা য়াখিদবনি, ফেল ওইদুনা তোকখ্রবা মতূঙদা হন্দক স্মার্ট সিটি মিসনগী মনূঙচন্না লূপা ক্রোর কয়া চঙনা ট্রাফিক সিগনেল লাইট ১৫ নৌনা খিনখিবনি। লাইট ১৫ অসীগী মনূঙদা হৌজিক ৩ দি শীজিন্নবা য়াখিদ্রে।

লাইট অহুম অসী লমদমসিদা থোকপা থৌদোকশিংবু য়ানীংদবা মীয়াম্না খোঙজঙ চঙশীল্লকখিবদা, নহারোলশিংনা নূঙনা থোমজিনবা, থুগাইবা, থুদেক্লম্বা কয়াদগী লাইট অহুম অসী য়াখিদবনি হায়না মনাক নকপদা লৈবশিংনা ফোঙদোকই। য়াখিদ্রবশিং অদুদি শগোলবন্দ আরয়ান থিয়েটর জঙ্কসন, শীঙজমৈ চীঙামখোঙ জঙ্কসন অমসুং ক্বাকৈথেল জঙ্কসন দা খিনবা সিগনেল লাইটশিংনি। শীজিন্নবদি কাবক-কাবক য়ারগা মফম চাদনা য়ুংবা অমসুং মওং চুমদনা ইন্সটোল তৌরম্বদগী মূত্থত্তুনা থম্লিবা সিগনেল লাইট ৬ অদুদি, এল আই সি/ পি দব্লিয়ু দি জঙ্কসন, পিশুমথোং ময়ায় লৈকায় জঙ্কসন, কৈশামথোং ময়ায় লম্বী জঙ্কসন, শঙাইপ্রৌ রিগুলর রোদ জঙ্কসন, কোংবা শৌদোংপূঙ জঙ্কসন অমসুং শঙাকফম জঙ্কসন, হায়রিবশিং অসীনি।

হৌজিক নীঙথীনা ফঙ্কসন তৌরিবা সিগনেল লাইটশিং অদূদি খোংনাং অনী কারক জঙ্কসন, কৈশাম্পাৎ জঙ্কসন, জেনরেল পোষ্ট ওফিস জঙ্কসন বাবুপারা, রাজ ভবন জঙ্কসন, কংলা নোংচুপ হোজঙ জঙ্কসন অমসুং নোরথ এ ও সি জঙ্কসন হায়রিবশিং অসীনি। য়াখিদ্রবা ট্রাফিক সিগনেল লাইট ময়াম অসী অমুক হন্না শেমজীন্দুনা মীয়ামদা কান্নবা পীননবা থবক অমত্তা লৈঙাক্না ঙসীফাওবা পায়খৎলকপগী মমি তাদ্রিবসি লাইবক থীবনি হায়না মীয়াম্না ফোঙদোক্নরক্লি।