হন্দক হৌখিবা নুমিৎ খরনি অসীদা মনিপুরদা কুমগী নোং য়ৌরকখিবগা লোয়ননা অকনবা মওংদগী কা হেন্না কনবা মওংদা নোং লেপ্তনা হৈথরকখিবা লোয়ননা হৌজিক হৌজিকসু অকনবা নোং লেপ্তনা হৈথরক্লিবা অসীনা মরম ওইরগা ইম্ফালগী ময়োল ফাওদুনা চেল্লিবা নম্বুল তুরেলগী ঈশীং ঈমায় খুদোংথীবা য়াবা থাক্কি মথক্তা চেল্লে। ঈচাও থোক্লকপা য়াবগী থাক্তা লৈরি। মখা তানা পূঙ ২৪ অসীদা নোং তাবা লেপত্রবদি ঈশীং ঈচাও মায়োক্নরগনি হায়বগী থাজবা লৈরে। নম্বুল তুরেলগী মপামক্তদা হৌজিক লৈরিবা ঈশীং ঈমায়গী অৱাংবসি মিটর ৭৮২.৮৫ ওইরি অদুগা ঈচাও থোকপা য়ারবা থাক অদূনা মিটর ৭৮২.৭৫ নি।
মরম অসিনা য়াম্না তম্বা ঙমদবা, কিনিঙায় ওইরবা থাক অমদা লৈবদগী তুরেল অসীগী মনাক নকপদা লৈরিবা অমসুং অকোয়বা মফমশিংদা লৈবা মীয়াম অহীঙ- নুংথিল তূম্বা ঙম্নদনা পাখত্তুনা কোয়চেন চেন্নরগা লৈরি। শাফগদবা মফমশিংদা হোংদোক্নবসু য়াওরি। ঈম্ফাল তুরেল অসীসু জূন থা হৌগৎলকপদা ঈশীঙগী ঈমায় কা হেন্না ৱাংখলক্তুনা মফম কয়াদা তোরবান কায়বা অমসুং তোরবান পাথোকখিবদগী পাক-সন্না ঈচাও মায়োক্নখিবদগী ফীভম খরা ফগৎলকপা হৌরকপদা ঙায়রিঙৈ তাল্লকশিদা ৱার্নিং লেভেলগী মথক্তা ঈশীঙগী ঈমায় হেঙ্গৎলক্লি।
চৈরকশিদা ময়াং ইম্ফাল কেন্দ্রগী মনূঙচন্না লৈরিবা কোঞ্চাক মখা লৈকায় এরিয়াদা ঈথৈ-লৌখোঙ নীঙথীনা লৈতবা মরম্না মৌখৎলকপা ঈশীংগী চেন্থোকফম লৈতবদগী য়ূম কয়া ঈশীঙগী ঈরোন্নুংদা লূপশীনখ্রে। লৈকায়গী ওরগনাইজেসন অমসুং ভল্লন্টরি য়ূথ কয়ানা হৌজিক খুদোংথীনিঙায় ওইরবা তুরেলশিংগী লৌনম্বালশিং লৈবাক হৈজীন্দুনা শেমজীনবগী থবকশিং চত্থরি।