ইজরেল অমসুং ইরান লৈবাক অনীগী মরক্তা অৱায়- অখূম লম্মন খুম্নরগা হৌজিক চত্থরিবা অকনবা নোংথক্কি লানগী চৈরক্তা য়ু এসনা বি-২ ষ্টিল্থ ফাইটর বোম্বরশিং শীজীন্নদুনা ইরানগী মরুওইবা ন্যুক্লিয়র সাইট অহূমদা এত্তেক চত্থদুনা অমাঙ- অতাশিং থোকহনখ্রবা মতূঙদা লান অসী মালেম পূম্বদা পাকথোক-চাউথোরক্তুনা মালেমগী অহূমশুবা লাঞ্জাও অমা থোক্লক্কদ্রা হায়বগী মিপাইবা চাউনা লৈরক্লি।
চৈরকশিদা ইরান্দা লৈরিবা ইন্দিয়ানশিং অখন্নবা ফ্লাইটশিংদা ন্যু দিল্লিদা হোন্দোরকপগী থৌওংশিংসু হৌজিক লেপ্তনা চত্থরি। খ্বায়দগী অনৌবা ইভাক্যুয়েসনগী থবক ওইনা হৌখিবা নোংমাইজিং নুমিৎতা ইরানগী মাসাদ সহরদগী ইন্দিয়ান ৩১১ পুথোরকখিবগা লোয়ননা হৌজিক ফাওবদা লৈবাক অদূদগী পূন্না ইন্দিয়ান ১,৪২৮ ন্যু দিল্লিদা হোন্দোরকপা ঙমখ্রে।
য়ু এসনা ইজরেলগী মীচঙদা লেপ্তুনা ইরানগী য়াম্না মরুওইবা ন্যুক্লিয়র ফেসিলিটি অহূম চাউনা অমাঙ- অতা থোকহনবদগী পার্সিয়ান গল্ফ নেসন অমসুং ইজরেলগী মরক্তা হেন্না মূক্নহন্নবগী অচৌবা মরম অমসু ওইহল্লক্লি। মূক্নরিবা অসী লোইশিলহন্ননবা, সোল্যুসন অমা থৌরাং তৌনবদি হোৎনদ্রগা মূক্নবগী থৌওংসি পাকথোক-চাউথোকহন্ননবা নাকল অমখক্কি মীচঙ চঙশীনবা য়ু এসকি থৌশিল অসীবূ মালেমগী লৈবাক কয়ানা কন্না কন্দেম তৌনরক্লিবনি।