থোক্লিবা ঈরাং অসীদা চত্থোক-চৎশীনগী অথীংবা কয়া মায়োক্নরকপা মরম্না মনিপুরদা পোৎ-চৈগী মমল অতিয়া পক্না ৱাংখৎলক্লি, চুরাচান্দপুরদনা মসীগী চৈথেঙ হেন্না নংলি

হৌখিবা কুমশিং ২০২৩ গী মে থাদগী ঙসীফাওবদা মায়োক্নরগা লৈরক্লিবা হীঙশাগী ঈরাং অসীগী মথক্তা হন্দক হৌখিবা থাখায় অসীদা ষ্টেট অসীদা অকনবা নোং লেপ্পা লৈতনা হৈথরকখিবদগী মনিপুরগী চীঙগী মফম কয়াদা পাক-সন্না চীঙ নীঙখায়বগী থৌদোকশিং থোকখিবা লোয়ননা চীঙগী মফমশিংদা লৈরিবা নেস্নেল হায়ৱেশিংদা কুকি-জো কম্যুনিটিগী মিলিটেন্টশিংনা ঙাইহাক লৈতনা বন্দ, ব্লোকেদ অমদি লম্বীদা লাকপা গারিশিংদা নোংমৈ কাপশীনবগী থৌওং কয়া চত্থরক্তুনা এক্সটোর্সন চত্থরকখিবা কয়া অসীনা মরম ওইরগা নেস্নেল হায়ৱেশিংদা গারিশিং মরাঙ কায়না চৎনদবনা মনিপুরদা নোংমগী তঙায়ফদনা চঙবা পোৎলমশিংগী য়াওনা পোৎ- চৈ মখল খূদীংমক্কি মমল হৌজিক অতিয়া পক্না ৱাংখৎলকপগী অৱাবা চৈথেঙ মীয়াম্না মায়োক্নরক্লি।

থোইদোক হেন্দোক্না কুকি-জো কম্যুনিটিনা নম্না খুন্দারিবা চুরাচান্দপুর দিষ্ট্রিক্ট কি ওইনদি হৌজিক ইম্ফালদগী মাল পুবা গারিশিং চৎপদা অথীংবা লৈরিবা মরম্না পোৎ-চৈ মরাঙ কায়না, চাং নাইনা ফংলক্তবনা মমল কা হেন্না ৱাংখৎলকপগী অৱাবা চৈথেঙ মায়োক্নরকপগী মথক্তা দরকার ওইবা চীঞ্জাক অমসুং অনা-লায়েংগা মরী লৈনবা পোৎলমশিং ফংবা ঙম্লক্তবগী অচৌবা অৱা-চৈথেং মায়োক্নরক্লি।

মিজোরাম ফাওরগা আসাম, মেঘালয়ানচিংবা য়ৌখিবা য়াবা চুরাচান্দপুর গী মরূওইবা লম্বী অসী গুইটে রোদ হায়রিবা চীঙলম্বী অসীগা ইম্ফাল জিরিবাম রোদ হায়রিবা অনী অসীখক্তনি অদূবু গুইটে রোদ হায়রিবা চীঙলম্বী অসীদি নোং কন্না চুথরকপা মতমদা লেন্দস্লাইদ য়াম্না থোকপা মরম্না মীয়াম চৎথোক-চৎশীন তৌবদা খুদোংচাদবা কয়ামরুম মায়োক্নরি। মরম অসীনা লৈঙাক্না হৌজিক থোক্লিবা ঈরাং অসী লোইশিনহন্ননবা থৌরাং লৌখৎত্রবদি মীয়াম হেন্না খুদোংচাদবা মায়োক্নরক্কনি হায়নরক্লি।