সেন্টরনা মনিপুরদা পি আর থম্লিবসিনা করি অহোংবা পুরক্লবগে, মমাঙগী লৈঙাক অদুগা খেন্নবা করিসু লৈত্রি, প্রাইম মিনিষ্টর মনিপুরদা চৎলু, ঈরাঙ লোইশিল্লু: জয়রাম রামেস

মনিপুরদা হৌখিবা কুমশিং ২০২৩ দগী ঙসীফাওবা থোক্লিবা হীঙশাগী ঈরাং অসী তুংকোইনা থোকহন্দনবা প্রাইম মিনিষ্টর নরেন্দ্র মোদিনা করিগুম্বা মখলগী ওইথোকপা য়াগদবা খোঙথাঙ অমত্তা ঙসিফাওবা লৌখৎলকপা লৈত্রি। মসী  খ্বায়দগী লাইবক থীবা অমনি। প্রাইম মিনিষ্টর নরেন্দ্র মোদি না খূদক্তা মনিপুরদা চত্তুনা ঈরাং অসী লোইশিন্ননবা অকনবা থবক পায়খৎকদবনি হায়না কর্নাটাকাগী রাজ্য সভাগী এম পিসু ওইরিবা ইন্দিয়ান নেস্নেল কংগ্রেস কি জেনরেল সেক্রেটরি জয়রাম রামেস না অকনবা ৱাফম ফোঙদোকখ্রে।

হৌখিবা থাংজা নুমিৎতা মীয়াম্না ইম্ফাল অমসুং অতৈ দিষ্ট্রিক্ট শিংদা অকনবা ঈরাং হৌরকখিবা থৌদোক্তা মীওই কয়ামরুম পুলিসনা এত্তেক চত্থবতা অশোক- অপন মায়োক্নরগা লৈরিবা অসিদা মহাক্না নুঙাইতবা ফোঙদোকখিবগা লোয়ননা প্রাইম মিনিষ্টর নরেন্দ্র মোদী মনিপুরদা চৎকদবনি হায়না অকনবা ৱাফম ফোঙদোরকখিবনি। প্রাইম মিনিষ্টরনা মনিপুরদা হৌজিক থোক্লিবা হীঙশাগী ঈরাং অসিগী মতাঙদা থওইদনা লৈথোক্লি, খঙশীন- উশিন্নদনা লৈরিবসি অচূম্বা খোঙথাঙ অমত্তা য়াওদে হায়খি।

মনিপুরদা বি জে পিনা লুচিংবা অনিশুবা টার্ম গী লৈঙাক অমা হৌখিবা কুমশিং ২০২২ গী ফেব্রুয়ারি থাদা লৈরকখ্রবা মতূঙ থা ১৫ লৈরম্লগা কুমশিং ২০২৩ গী মে অহুমদা মনিপুর মৈ চাক্লকখিবনি। ঈরাঙ অসীদা নূপী-অঙাঙ য়াওনা মীওই চা কয়া শিহনখ্রে, মীওই লীশীং ৭০ রোম মশাগী মরমদমদা লাঞ্জেন্নরগা লৈহল্লে। হৌখিবা কুমশিং ২০২৩ গী জূন ৪ দা মেম্বর অহুম্না শাবা কম্মিসন ওফ ইনক্বারি শেমদুনা ঈরাং অসিগী মতাঙদা থিজিন্ননবা হোৎনরি হায়রবসু রিপোর্ট অমত্তা লানখৎপা ঙমদনা মতম কয়ারক হঞ্জিন-হঞ্জিন  থাদোক্তুনা থেংখাঙ কয়ারক লাকখ্রবা মতূঙ হৌজিক্না অমুক চহী অসীগী নবেম্বর থা ফাওবদা রিপোর্ট লানখৎলগনি হায়রিবসি করেম কথায়নবগী মওংনি হায়না মহাক্না পেন্দবা ফোঙদোকখি।