খূরায় হৈক্রুমখোংগী ঈচাওনা মাঙহনখ্রবা য়ূমশিংগী মনূঙদগী ঈমূঙ ৮ গী য়ূম অহানবা তাঙ্কক্কি ওইনা শাননবা এম এল এ সুশীন্দ্রোনা য়েংশিনখ্রে

হৌখিবা মে ৩১ গী অঙনবা অয়ূক্তা খঙহৌদনা ইম্ফাল তুরেলগী তোরবান কায়রক্তুনা অকনবা ঈশীঙগী ইরৈনা চেন্থখিবা অমসুং খূদক্কি ওইবা ঈচাওনা অমাঙ অমাঙ- অতা থোকহনখিবদগী শীজিন্নবা য়াদ্রবা য়ূম কয়ামরূম খুরায় কেন্দ্রগী এম এল এ লৈশাংথেম সুশীন্দ্রোনা নৌনা শাগদৌরি। তুরেলগী তোরবান খঙহৌদনা মিটর কুনলোম শাংনা কায়খিবদগী লেপ্পা লৈতনা ইম্ফাল তুরেলদগী খূরায় হৈক্রুমখোংগী লমকা এরিয়াদা অকনবা ইরৈগা লোয়ননা চেন্সীল্লকখিবা থৌদোক্তুদা খূরায় হৈক্রুমখোংগী মশীঙ য়াম্লবা য়ূমশিং, খূরায় খোমিদোক মুসলিম, খূরায় কোন্সম লৈকায়, খাবৈশোয়নচিংবা মফমশিংদা ঈচাও মায়োক্নরগা লৈরকখিবনি।

ইম্ফাল তুরেলগী তোরবান কায়রকখিবদু এম এল এ লৈশাংথেম সুশীন্দ্রোনা মশাগী লৈজবা জে সি বি, দিম্পরনচিংবা গারি কয়ামরুম পুথোরক্লগা মশামক্না জে সি বি, প্রোক্লেন্নচিংবা থৌদুনা অহীঙ অহূম-মরি চঙনা অহীঙ মীৎশেল খাঙদুনা হোৎনবদগী মপূঙফানা মেন্সিনখিবনি। তুরেলগী লৌনম্বাল অসীগা তাইনরিবা অতোপ্পা নাকলগী শরুক্তা লম্বী অমসু শেম্ননবা এম এল এ অসিনা অকনবা থৌরাং লৌখৎলক্লি। নৌনা শাগদৌরিবা য়ূমশিং অদূগী মনূঙদা অহানবগী ওইনা য়ূম নিপান ঙরাংদগী শাবা হৌখ্রে। থা অসীগী তরেত্তা য়ূমশিং শাগদৌরিবা খূরায় হৈক্রুমখোংগী লমকা এরিয়াদা এম এল এ মশামক চত্তুনা মফম য়েংশিনখিবগা লোয়ননা খূদক্তগী য়ূমশিং অদূ শাননবা য়ূম্ফম য়াৎননবা য়ূম্বূশিংদা পাউতাক পীখি লোয়ননা ঙরাংদগী য়ূম ৮ অহানবগী ওইনা শাননবা মরী লৈনবশিংদা খঙহনখিবনি।

ঈশীঙ চেন্থোকখিননবা মীয়াম্না কলভর্ট ফক্কায়বদগী গারী অমসুং খোঙনা চৎপা য়াদনা লৈরকখিবা ইম্ফাল-পাঙ্গৈ লম্বী পরীঙগী খূরায় হৈক্রুমখোং দা লৈবা লম্বীগী অকায়বা মফম অদূসু এম এল এ অসীনা মপূঙফানা শেমজীনবদগী হৌজিক মীয়াম চত্থোক-চৎশীন তৌবদা অপন- অরাক অমত্তা লৈত্রবনি।মীয়াম্না এম এল এ লৈশাংথেম সুশীন্দ্রোবু মায়কৈ কয়াদগী লেপ্পা লৈতনা থাগৎনরক্লি।