লম্লাই কেন্দ্রগী রেদ জোন এরিয়াগী ঈমূঙশিংদা দেবেন্না তেঙবাংগী পোৎলমশিং য়েন্থোকখ্রে

মনিপুরদা হৌখিবা কুমশিং ২০২৩ গী মে অহুমদগী ঙসীফাওবা চহী অনী হেল্লক্লবা হীঙশাগী ঈরাং অসীদা লম্লাই কেন্দ্রগী মনূঙচন্না চীঙগা তাইননা লৈরিবা তম্পাক্কি মৈতৈ ফূরূপ্না খুন্দারিবা থম্নাপোকপী, শান্তি খোঙবান অমসুং সনাশাবী হায়রিবা মফমশিং অসীদা কুকি-জো কাঙলূপকি মিলিটেন্টশিংনা ঙাইহাক লৈতনা নোংমৈ কাপশীন্দুনা লান্দারকপদগী খুঙ্গংশিং অসী রেদ জোন ওইনা লৈরক্লিবনি।

হৌখিবা থা অহূমলোমগী মমাঙদসু থাবূম অমরোম চূপ্না কুকি-জো মিলিটেন্টশিংনা চীঙথক্তগী নোংমৈ, বোম কয়ামরুম লেপ্পা লৈতনা কাপশীন্দুনা লান্দারকপদগী মীওই কয়া শোকপদগী শোইনাইবা ফাওবা য়াওখ্রবনি। লম্লাই কেন্দ্রদা মমাঙগী এসেম্বলী মীখলদা ইন্দিয়ান নেস্নেল কংগ্রেস কি টিকেত্তা লম্বা থেংনখিবা অচোইবম দেবেন্না ঙরাং রেদ জোন ওইনা লৈরিবা থম্নাপোকপী খুঙ্গংদা চত্তুনা মফম অদূগী অৱাবা, খুদোংচাদবা মায়োক্নরগা লৈরিবা ঈমূঙ- মনূঙগী মীওইশিংদা নোংমগী তঙায়ফদনা চঙবা চান্ন-থক্ননবা পোৎলমশিং অমসুং অতৈ,ঈমূঙগী মথৌতাবা পোৎলমশিং তেঙবাং ওইনা য়েন্থোকখ্রে।

থৌরমদুদা ৱা ঙাঙবদা দেবেন্না হায়, হন্দক লম্লাই কেন্দ্রগী মনূঙচন্না লৈরিবা গ্বালতাবিদা ইন্দিয়ান মিলিটরিনা চত্থখিবা কা হেঞ্জিনবা থৌওং অদূগী মায়োক্তা কন্সর্ন এম এল এ অমা ওইনা লৈরিবা বি জে পিগী এম এল এ খোংবান্তাবম ইবোমচানা মনিপুর মীয়ামগী ইহুল খঙনা সেন্তর অমসুং ষ্টেট অথোরিটিশিংদা করিগুম্বা ৱাফম অমত্তা ফোঙদোক্তনা ঙসিফাওবা তূমীন্না লৈরিবসি অঙকপা ফাওই হায়না ফোঙদোকখি। কোকোমি অমসুং মনিপুরগী মীয়াম্না চঙশীল্লক্লিবা খোঙজঙ অসী করিগীনো হায়বা লম্লাই কেন্দ্রগী এম এল এ না ঙসীফাওবা খঙশীন্নদনা লৈরিবসি দাইত্যা মশক খঙজদবগী ময়েক লারবা খূদম অমনি হায়খি।