সি এস ওশিং পূন্সিন্দুনা থবক পায়খৎমিন্নরবদি চাওখৎলবা মনিপুর অমা ওইগনি: গোবিন্দাস কোন্থৌজম

মনিপুরদা লৈরিবা এম এল এ অমসুং মিনিষ্টরশিং লিংজেল মান্নবা ঙমদবনা লো এন্দ ওর্দর অমসুং চাওখৎ-থৌরাংগী থবক-থৌরম খূদীঙদা থীন্থরগা লৈবনি হায়না সিভিল সোসাইটি ওরগনাইজেসন (সি এস ও) শিংনা অকনবা মরাল শীদুনা লাক্লি। মশীমক অচূম্বা ৱাফম অমনি অদূম ওইনমক লমদমসিদা লৈরিবা ঐখোয়গী সি এস ওশিং অসীসু অমগা অমগা ৱাখল তামিন্নদুনা পূন্না, অমত্তা ওইনা খোঙজঙশিং চঙশীনমিন্নরগা থবক পায়খৎলবদি এম এল এ, মিনিষ্টরশিংসু মরোমদোম অমত্তা ওইনা পূন্সীলহনবা ঙম্লক্কনি, মতমদুদা ঐখোয়না পাঙথোকপা ঙমদবা থবক অমত্তা লৈরোই হায়না এম এল এ গোবিন্দাস কোন্থৌজমনা ফোঙদোকখ্রে।

বিষ্ণুপুর ম্যুনিসিপাল কাউন্সিল ৱার্দ নম্বর মঙা অমসুং তরুক্কি মনূঙচন্না লৈরিবা লোকেল ভল্লন্টরি ক্লবশিংগী এপেক্স বোদি ওইনা লৈরিবা য়ূথ ৱেলফ্যের ওরগনাইজেসন গী নৌনা শাবা বিল্ডিং শঙ্গাদুনা মীয়ামদা খূৎশীন্নখিবা থৌরমদা অথোয়বা মীথূঙলেন ওইনা শরুক য়ারদুনা ৱা ঙাঙবদা এম এল এনা ৱাফম অসী ফোঙদোকখিবনি।

লৈকায় অমদা ক্লব অমা লৈবা হায়বসি চাওখৎ- থৌরাংশিং পায়খৎনবগীদমক তঙায়ফদবা অমনি। অদূম ওইনমক খুঙ্গং অমসুং মরী লৈনবা লৈকায়-লৈকায়শিং অদূগী নহারোলশিংনা পূন্না থবক- থৌরমশিং মথঙ-মনাওনাইনা পাঙথোকপগী তঙায়ফদবা লৈ। মীয়ামগী অমসুং খুন্নাইগীদমক থবক তৌগদবা নহারোলগী মশীঙ হেন্না লৈরবা মতমদা চাওখৎলবা, শান্তি লৈবা ঈরমদম অমা শেমগৎপা ঙম্লক্কদবনি হায়না মহাক্না মখাতানা ফোঙদোকখি। ঙরাংগী থৌরমদুদা য়ূথ ৱেলফ্যের ওরগনাইজেসন  অদূগী প্রসিদেন্ট এন ইঙোচা, ৱার্দ নম্বর তরুক্কি কাউন্সিল্লর দব্লিয়ু রাধে,  ৱার্দ নম্বর মঙাগী কাউন্সিল্লর টি ঐচ ইন্দ্রমনি অমসুং অতৈ মীওইশিং শরুক য়াখি।