ভি দি এফশিংগী দিমান্দ মরম চায়, লৈঙাক্না মখোয়গী দিমান্দ পীগদবনি: মৈরা পায়বী

মনিপুরদা লৈরিবা ইন্দিয়া রিজার্ব বট্টালিয়ন ( আই আর বি) পার্সনেলশিং, মনিপুর পুলিস অমসুং মনিপুর রাইফলস পার্সনেলশিংগা চপ মান্নবা মওংদা অহীঙ-নুংথিল তূম্বা চাবা থিদনা মীয়ামগী পুন্সি অমসুং লন-থুম ঙাক্ননবা মথৌ তৌরিবা ভিল্লেজ দিফেন্স ফোর্স (ভি দি এফ) পার্সনেলশিং না মখোয়গী থাগী পে হেঙ্গৎহনবিয়ু হায়বা য়াওনা তোঙান- তোঙানবা দিমান্দ তৌদুনা খূৎলায় থাদোকপগী খোঙজঙ চঙশীনখিবসি লৈঙাক্না অথূবদা মীৎয়েং চঙবিদুনা মখোয়গী দিমান্দ খূদক্তা পীথোক্কদবনি হায়না মৈরা পায়বী ঈমাশিংনা ফোঙদোরক্লি।

ভি দি এফ পার্সনেলশিংনা চত্থরক্লিবা খোঙজঙ শৌগৎলদুনা থৌবাল দিষ্ট্রিক্ট কি মনূঙচন্না হৈরোক পার্ট-থ্রী, ইঙালোক্কি ঈমা মৈরা পায়বীশিংনা খুল অদুদা ৱাকৎ মীফম অমা চত্থখ্রে। মৈরা পায়বী লূপ অসীগী লুচিংবী ঈমা এন ননাউ লৈমনা হায়, ভি দি এফ পার্সনেলশিংনা চঙশীল্লিবা খোঙজঙ অমসুং তাল্লিবা দিমান্দ পূম্নমক য়াম্না অচূম্বা অমসুং মরম চাবা ঙাক্তনি। মৈরা পায়বী লূপ অসীনা ভি দি এফ পার্সনেলশিংগী খোঙজঙদা মতম পূম্নমক্তা শৌগৎখিগনি হায়খি। ইঙালোক্কি মীয়াম অমসুং লন- থুম পূম্নমক চহী অনী হেল্লক্লবা হীঙশাগী ঈরাং অসীদা ভি দি এফ ঈচাশিং অসীনা ঙাক-শেন্দুনা লাক্লিবনি। মনিপুরগী লো এন্দ ওর্দর ঙাকপদা, মীয়ামগী পুন্সি কন্ননবা হোৎনবদা ভি দি এফ পার্সনেলশিং অসীসু পুলিস, এম আরনচিংবদগী তাদনা মথৌ তৌরক্লিবনি। মখোয়না ফংলিবা থাগী তোলোপ অসী য়াম্না হন্থমল্লি। মখোয়সু ঈমূঙ-মনূঙ পুরিবা ঙাক্তনি হায়খি।

লৈঙাক্না মখোয়গী তোলোপ হেনগৎপা য়াওনা ভি দি এফ শিংগী দিমান্দ খূদক্তা পীথোক্ট্রবদি মৈরা পায়বী ঈমাশিংনা অকনবা খোঙজঙ চত্থরক্কনি। ইঙালোক্কি মীয়াম চেকশীন্না ঙাক-শেনবগী থবক তৌরিবা ভি দি এফ পার্সনেলশিং অসী মখোয়গী সিজ ৱার্ক ষ্ট্রাইক চত্থখ্রবনা মরম ওইরগা খুল অসী থাদোক্তুনা চৎলগে হায়রক্লে। মখোয় চৎখ্রবদি কুকি-নার্কো টেরোরিষ্ট শিংনা লান্দারক্কদবগী ঙাইদুনা লৈরিবনি হায়খি।