সিরুই ফেষ্টিভেল দা মৈতৈ য়াওরকপা য়ারোই হায়রক্লিবা কুকিগী লূপ অদূ য়ূম্ফম য়াওদবনি, শাশিন্নবা ওইগনি,অসীগুম্বা লূপ অমত্তা মনিপুরদা লৈতে: পুলিস

হন্দক মে ২০ দগী ২৪ ফাওবা ঊখ্রূল দিষ্ট্রিক্ট কি সিরুইদা পাঙথোক্কদৌরিবা সিরুই লিলি ফেষ্টিভেল অসীদা মৈতৈ ফূরূপকি মীওইশিং য়াওবা য়ারোই হায়না তোঙান তোঙানবা সোসিয়েল মেদিয়া প্লেটফোর্ম শিং অমদি লোকেল মেদিয়া আউটলেটশিংদা ফোঙদোক্নরকখিবা অদূ য়ূম্ফম য়াওদবা অমনি। মৈতৈশিংদা থ্রেট তৌরক্লিবা কুকি-জো ভিল্লেজ ভল্লন্টিয়র্স ইষ্টর্ন জোন কৌবা ওরগনাইজেসন অদূ মনিপুর পুলিসনা য়াম্না কূপথনা থিগত্তুনা য়েংলুবদা মনিপুরগী মফম অমত্তদা লৈরমদ্রে হায়রি।

খুন্নাই অসিদা মথায়-থায়নদগী নুংশি-চান্ন না হিংমিন্নরগা লৈমিন্নরক্লিবা য়েলহৌমী কাঙলূপশিংগী মরক্তা য়ৈখায়-থিনগাইবা , নুংশিনহন্দনবা কোক থাধদুনা লৈরবা মীফত্তা খরনা পঙহায় হায়জীনবা তোকঙা অমনি। মসিদা সধারন মীয়াম্না থাজবিরুগনু, ঈঙনা-চীক্না, শান্তি ওইনা লৈবিয়ু হায়না মনিপুর পুলিসকি মায়কৈদগী ফোঙদোরক্লি। হন্দক ষ্টেটকি থাক্তা পাঙথোক্কদৌরিবা সিরুই লিলি ফেষ্টিবেল অসীদা মনিপুরগী য়েলহৌমী কাঙলূপ পূম্নমক্না মপূঙফানা শরুক য়াবিয়ু, মদূগীদমক মীয়ামগী অশোয়- অঙাম অমত্তা থোকহন্দনবা ষ্টেট পুলিস অমসুং সেন্ট্রেল সেক্যুরিটি ফোর্স কি মায়কৈদগী মতীকচাবা সেক্যুরিটি পীননবা থৌরাং পূম্নমক লোইরে। মীয়াম মিপাইনিঙায় অমত্তা লৈতে হায়না পুলিস অথোরিটিনা খঙহল্লক্লি।

পনবা য়াই, হন্দক পাঙথোক্কদৌরিবা সিরুই লিলি ফেষ্টিবেল অসীদা মৈতৈশিংনা শরুক য়ানবগীদমক কুকি-জো ফূরূপ্না খুন্দারিবা মফমশিংদা ফাওদোক-ফাওজীন তৌদুনা চৎপা য়ারোই হায়না মফম মরাঙ খঙদবা লূপ অসীগী মিং শীজীন্নরগা লমদম অসীগী লোকেল ভর্নাক্যুলরশিংদা ফোঙবা পাউচেশিংদা য়েন্থোরকপদগী মীয়াম্না মিপাইবা পোক্নখিবনি।