সলান্থোং শেমজীনবা লোইশিল্লক্কদৌরে, মীয়াম হরাওনরে

ইম্ফাল ইষ্ট দিষ্ট্রিক্ট কি খূরায় কেন্দ্র অমসুং হৈঙাঙ কেন্দ্র অনী ফাওনরিবা খ্বায়দগী মরূওইবা থোং অমা ওইরিবা, ইম্ফাল তুরেলগী মথক্তা শাবা, লিরবা থোং অমা ওইরিবা খূরায় সল্লান্থোং হায়না খঙনরিবা থোং অসী হৌখিবা থা মরিরোমগী মতমদগী ঙসীফাওবা নৌনা রিনোভেসন, রিপ্যারিংগী থবক অমসুং ইলিভেসনগী থবকশিং চত্থদুনা লৈরকখিবদগী হৈঙাঙ অমসুং খূরায়গী মীয়ামখক্তা নত্তনা মনিপুরগী অতৈ মফমশিংদগী লাকপা মীওইশিংনা চত্থোক-চৎশীন তৌবদা, থোং অসী থিংজিনখিবদগী খুদোংচাদবা কয়ামরুম মায়োক্নদুনা লম্লোং থোং য়ৌবফাওবা কোইথোক্লগা চৎনরম্বা অদূ নুমিৎ খরনিগী মনূঙদা গারিশিং লান্থোক- লান্সীন তৌদুনা চৎপা য়ারক্ক দৌরে।

থোং অসী ফুট মরি ৱাংখৎহনবা অমদি অতৈ রিনোভেসনগী থবক-থৌরমশিং চত্থদুনা লাক্লিবনি। ইম্ফাল ইষ্টকি ওইনা য়াম্না মরুওইবা থোং অমা ওইবতা নত্তনা মনিপুরগী ওইনসু খ্বাইদগী লিরবা অমসুং মরুওইবা থোংশিংগী মনূঙদা অমা ওইরিবা সল্লান্থোং অসী হান্না লৈরম্বা অৱাংবা লেভেল অদু কুমগী ঈশীং ঈচাও থোক্লকপদা ইম্ফাল তুরেলগী তোরবান পাথোক্কে তৌরকপা মওংদা ঈশীং ঈচেল লাকপা মতমদা সল্লান্থোং অসীদা ঈশীংগী ঈচেল পন্দুনা ঈশীং মৌখৎলকপগা লোয়ননা ঈশীংগী ঈচেলদা য়াওরকপা ফত্ত-হৌদিশিং, প্লাষ্টিক বোট্টলশিংগী মপৈ-মপৈনা থোং অসীদা পন্দুনা লৈবদগী ঈচেল তপথহনবা, মৌখৎলকপা তৌদুনা মনাক নকপদা লৈবা তুরেলগী তোরবান নীঙখায়হন্দুনা মীয়ামদা ঈশীং ঈচাওগী অৱাবা খুদোংচাদবা কয়া মায়োক্নহনবগী মথক্তা লন-থুম কয়ামরুম চহী খূদীঙগী মাঙহন-তাকহনগী থৌদোকশিং মায়োক্নদুনা লাকখিবনি।

হান্নগী মনিপুর লৈঙাক্কি চিফ মিনিষ্টর নোংথোম্বম বিরেনগী মীৎয়েং মখাদা থোং অসী হান্না লৈজরম্বা মশাগী অৱাংবা অদুদগী ফুট মরি নৌনা ৱাংখৎহনখিবনি।থোং অসী হাংদোকপা হৌরে, খোঙনা চৎপশিং হৌজিক থোং অসীদা চত্থোক চৎশীন তৌবা য়ারে। নুমিৎ খরগী মতুঙদা গারিশিংসু চৎপা য়ারক্লগনি হায়রি।