সেকমাই কেন্দ্রগী সেঞ্জম খূনৌ কম্যুনিটি হোল দিঙ্গোনা শঙ্গাখ্রে

মনিপুর লৈঙাক্কি হান্নগী মিনিষ্টর অমসুং সেকমাই কেন্দ্রগী এম এল এ হৈখাম দিঙ্গোনা ঙরাং কেন্দ্র অসিগী মনূঙচন্না লৈরিবা সেঞ্জম খূনৌ কম্যুনিটি হোল শঙ্গাখ্রে। সেঞ্জম খূনৌদা নৌনা শাবা কম্যুনিটি হোল অদূ শঙ্গাবগী থৌরমদুদা খুঙ্গং অদূগী ৱার্দ মেম্বর তাউরেম ইনাউচা অমসুং লৈকায় অদূগী নহা-অহল কয়ামরুম শরুক য়াখি।

থৌরমদুদা এম এল এ না হায়, মনিপুরদা হৌজিক থোক্লিবা হীংশাগী ঈরাং অসীদা ইম্ফাল নোংচুপ পানাগী মনূঙদা খ্বায়দগী হেন্না ঈরাঙ কন্দুনা হীঙশা অসীগী চৈথেঙ মায়োক্নরিবা এরিয়া অসি সেকমাই কেন্দ্র অসীনি। অদূম ওইনমক কেন্দ্র অসীগী মীয়ামগী মপূঙ ফাবা মতেংগা লোয়ননা মহাক্না কন্না হোৎনবদগী মীয়ামগী পুন্সি অমসুং লন-থুম কলহৌবদি ঙম্লে। ঈরাঙ মনূঙদা ষ্টেট অমসুং সেন্ট্রেল সেক্যুরিটি ফোর্স ১৫০০ হেন্না দিপ্লোই তৌদুনা মীয়ামগী পুন্সি অমসুং লন-থুম কন্ননবা মহাক্না থবক পায়খৎখি। ভিল্লেজ ভল্লন্টিয়রশিংনসু মহাক্কি মতেং মপূঙফানা পাংখি হায়না দিঙ্গোনা ফোঙদোকখি।

চাওখৎ-থৌরাংগী মতাঙদা পল্লদুনা এম এল এ না হায়, শীঙনবা কয়া মায়োক্নরবসু সেকমাই কেন্দ্রগী ওইনদি হীরম খূদীঙমক্তা চাওখৎননবা থবক-থৌরমশিং লেপ্তনা পায়খৎলি। শঙ্গাখিবা সেঞ্জম খূনৌ কম্যুনিটি হোল অদূসু য়াম্না থুনা চাউথোক্নবা হোৎনগনি হায়খি। খূরখূল-ফূম্লৌ লম্বীগী ফীভম ফত্রিবসি নেস্নেল স্পোর্টস য়ুনিভর্সিটি শেমগৎপগা মরী লৈননা য়াম্না অরূম্বা পোৎ-চৈ পুবা গারিশিং ঙাইহাক লৈতনা চত্থোক- চৎশিন তৌবননি। ফিভম ফগৎহন্ননবা হোৎনরি। লাইরেন শজিক, কদাংবন্দ, তেরা উরক্ন চিংবদসু দেভলপমেন্ট পুরক্ননবা হোৎনরি হায়খি।