পি আর মনূঙদা সেপরেট এদমিনিষ্ট্রেসন ফংগনি হায়বগী থাজবা লৈরে: সৈলেন হাওকিপ

মনিপুরদা হৌজিক প্রসিদেন্ট রুল লৈরিঙৈ চৈরকশিদা কুকি- জো কম্যুনিটিনা তাল্লিবা সেপরেট এদমিনিষ্ট্রেসন ফংলগনি হায়বগী অচেৎপা থাজবা লৈরে হায়না কুকি নেস্নেল ওরগনাইজেসনগী স্পোক্সপার্সন ওইনা লৈরিবা সৈলেন হাওকিপ না ফোঙদোকখ্রে। হৌখিবা এপ্রিল ২৭ তা স্পেস সেসন হায়না মিংথোনবা খন্ন- নৈনবগী থৌরম অমা মাইক্রোব্লোগ্গিং সাইট এক্স তা পাঙথোকখিবা থৌরমদা মহাক্না ৱাফম অসী ফোঙদোকখিবনি। মহাক্কি ৱাফম অদূ তোঙান- তোঙানবা মেদিয়া আউটলেটশিংদসু ফোঙনরকখ্রবনি।

মহাক্না মখাতানা ফোঙদোকখিবা মতূঙ ইন্না, সস্পেন্সন ওফ ওপরেসনগী গ্ৰাউন্দ রুলদা পল্লিবা টেরিটোরিয়েল ইন্টিগ্ৰিটি ওফ মনিপুর হায়বা ৱাফম অদূ ৱাহন্থোক লৈতবা অমসুং কুকিশিংগা মরী লৈনদবা অমখক্নি। হৌজিক প্রসিদেন্ট রুল থম্লক্তুনা মনিপুর লৈঙাক সস্পেন্ডেদ এনিমেসন্দা লৈরে। অসিগুম্বা তাঞ্জা অসিদা কুকিশিংগী দিমান্দ ফংহৌনবা খূৎশম্নরগা মাঙলোমদা চঙশীন্নবা হোৎনগদবনি। পূন্সীন্দুনা হোৎনরবদি লৈঙাক্নসু থবক শোয়দনা লৌখৎলক্কনি হায়খি। মতম অদূ হৌজিক অসীনি, খুদোংচাবা তাঞ্জা অসি মাঙহল্লরোইদবনি হায়খি।

লৈঙাক্না মসীগী মতাঙদা মমাঙদগী হৌনা কুকিশিংদা কয়ারক হন্না থাজবা পীবা লৈখ্রে হায়নসু হাওকিপ্না ফোঙদোকখি হায়রি। মনিপুরগী চিফ মিনিষ্টরনা মরম ওইদুনা হৌজিক লৈরিবা হীঙশাগী ঈরাং অসী থোকহনবনি। মৈতৈশিংনা টেরিটোরিয়েল ইন্টিগ্ৰিটি হায়জবনি। মদূ কুকি- জো ফূরুপকা মরী লৈনদে। ঈরাং অসী থোক্লক্ট্রিঙৈদা টেরিটোরিয়েল কাউন্সিলগী দিমান্দ তৌরম্বনি অদূবু ঈরাং অসী থোক্লকখ্রবা মতূঙদগীদি মদূগী মথৌ তাদ্রে হায়খি। হৌজিক কুকিশিংগী অমত্তা ঙায়রবা দাবীদি সেপরেট এদমিনিষ্ট্রেসন হায়বসিনি হায়না মহাক্না ফোঙদোকখি। চুরাচান্দপুরবু লমকা অমসুং কাংপোকপিবু কাঙ্গুই হায়না মিং ওন্থোকপগী হক কুকিশিংদা লৈজৈ হায়নসু হাওকিপ্না ফোঙদোকখি হায়রি।