অথূবা মতমদা মনিপুরদা মীয়ামগী লৈঙাক অমা শেম্লগনি হায়বগী থাজবা লৈরে:স্পিকর সৈত্যবর্তা

হৌখিবা নুমিৎ খরনিগী মমাঙদা মনিপুরগী গভর্নর অজয় কুমার ভাল্লাগা রাজ ভবন্দা উনদুনা হৌজিক ওইরক্লিবা লো এন্দ ওর্দরগী ফীভমশিং অমসুং রাজনিটিগী চরাঙনবা কয়াগী মতাঙদা খন্ন- নৈনখিবা লৈখ্রে। মনিপুরদা মীয়ামগী ওইবা লৈঙাক অমা অথুবা মতমদা মীয়াম্না উবা ফংলগনি হায়বগী অচেৎপা থাজবা লৈরে হায়না মনিপুর লেজিসলেটিব এসেমব্লিগী স্পিকর থোকচোম সৈত্যবর্তানা ফোঙদোকখ্রে।

লমদম অসীদা প্রসিদেন্ট রুল থম্লক্তুনা মনিপুর মীয়ামগী লৈঙাক থূপচীনখিবগা চপ মান্নরবা ফীভম অমদা লাকখিবা মতমদুদগী লমদমসিদা চাওখৎ- থৌরাংগা মরী লৈনবা থবক খূদীঙমক মঙম ঈশান-শানবা ঙমদনা লৈরি। মীয়াম্না পোপ্যুলর গভর্নমেন্ট অমা মনিপুরদা লৈহনবা পাম্লি। মদূমক মীয়ামগী মীহুৎ ওইনা লৈরিবা এম এল এ শিংগীসু অপাম্বনি হায়না স্পিকরনা ফোঙদোকখি।

মহাক্কি য়াইস্কুল কেন্দ্রগী মনূঙচন্না লৈরিবা ৱাংখৈ কৈথেল অশাংবিদা হন্দক্তা নৌনা শাবা মৈরা শঙ অমা শঙ্গাবা থৌরম শরুক য়ারুরবা মতূঙদা পাউমীশিংগা উনখিবা অমদা মহাক্না ৱাফম অসী ফোঙদোকখিবনি। মহাক্না মখাতানা ফোঙদোকখিবা মতূঙ ইন্না, হৌখিবা এপ্রিল থাগী লোইশিল্লমদাই শরুক্তসু মনিপুরগী এম এল এ ২১ না পূন্না খূৎয়েক পীদুনা মীয়ামগী লৈঙাক অমা শেমজরগে হায়না প্রাইম মিনিষ্টরগী ওফিসতা অমসুং য়ুনিয়ন হোম মিনিষ্টরগী ওফিসতা চেরোল পীশীনখিবসু লৈখ্রে হায়না সৈত্যবর্তানা ফোঙদোকখি। হৌজিক লৈরিবা রাজনীতি গী ফীভম অসিদা স্পিকর অমা ওইনা পূম্নমক ফোঙদোকপা য়াদবা কয়াসু লৈরি। ঐখোয়গী এম এল এ শিংনা মীয়ামগী ইহুল খঙনা পূন্সীনবা ঙম্লবদি য়াম্না অথূবদা পোপ্যুলর গভর্নমেন্ট অমা থম্বা ঙমগনি হায়খি।