অদূঙৈ কুমশিং ১৮৯১ গী এপ্রিল ২৩ দা অথৌবা পাউনা ব্রজবাসিনা লুচিংবা মনিপুরগী মশীঙ য়ামখিদ্রবা লান্মীশিংনা ব্রিটিশ লান্মীশিংগা খোংজোমগী খেব চীঙদা মায়োক্নখিবা মনিপুরগী অরোয়বা নীঙতম্বগী লানফমদা থৱায় কৎখ্রবা অথৌবা ঈপা-ঈপূশিং অদূবু নীঙশিংদুনা চহী খূদীঙগী এপ্রিল ২৩ দা পাঙথোক্তুনা লাকপা খোংজোম দে থৌরম ঙরাংসু মনিপুরগী গভর্নর অজয় কুমার ভাল্লানা লুচিংদুনা খোংজোমগী খেব চীঙদা লৈবা অথৌবশিংগী খুভমদা পাঙথোকখ্রে।
অয়ুক পূঙ ৯ তাবদগী হৌনা খেব চীঙদা লৈবা অথৌবশিংগী খুভমদা হৈকৎ-লৈকৎ তমদুনা ১৩৪ রক শুবা নীঙশীং থৌরম পাঙথোকখি। অহানবা মনিপুর রাইফলসকি কন্টিঞ্জেন্ট অমনা গার্দ ওফ ওনর পীখি। জেনরেল সেল্যুটনচিংবা লৈখিদ্রবা অথৌবশিংগী খুভমদা পীরবা মতূঙদা পাউনা ব্রজবাসিগী মিতমদা মখাতানা হৈকৎ-লৈকৎ তমদুনা ঈকায়খুম্নবা ঊৎখি।
মদূগী তুংদা খেব চীঙগী নাকন্দা চেল্লিবা খোংজোম তুরেলদা অথৌবশিংগী মফমদা হৈশোয় কৎলবা মতূঙ মখাতানা খোংজোম লাল মেমোরিয়েল কমপ্লেক্স তা মপূঙ ওইবা থৌরম পাঙথোকখি। খোংজোম লাল অসী ইচম চম্বা খূৎলায়গী লাল নত্তে, মরৈবাক নুংশিবগী খূদম্নি হায়না গভর্নরনা ফোঙদোকখি।