বেঙ্গলুরুদা লৈরিবা ইন্দিয়ান স্পেস রিছার্স ওরগনাইজেসন ( ইসরো) দা চত্থ বা স্পেস সাইন্স অমসুং টেক্নোলোজিগী থবক-থৌরমশিংগী মরমদা য়েংশিন্ননবগীদমক মনিপুরগী কোর্দিনেটর অমনা লুচিংবা মহৈরোয় ১৩ হৌখিবা নিংথৌকাবা নুমিত্তা ইম্ফাল থাদোকখ্রে। মহৈরোয়শিং অদূ নুমিদাংৱাইরম বির টিকেন্দ্রজিৎ ইন্টর্নেস্নেল এয়রপোর্ট থাদোকখিবনি। মনিপুর লৈঙাক্কি এদ্দিস্নেল দিরেক্তর ওফ ইদুকেসন অমসুং নোদেল ওফিসার ( এস/ভি) ওইনা লৈরিবা বিস্বেশ্বর খুমুকচম্না মহৈরোয়শিংগী খোঙচৎ অদূ লমথাখি।
থৌরমদুদা মহৈরোয়শিং অদূগী মমা-মপা ওইবশিং, ওজাশিং, মেদিয়া পার্সনশিং অমদি তোঙান তোঙানবা ওফিসিয়েল কয়াসু শরুক য়াখি। টুর অদূ নোরথ ইষ্ট ষ্টুদেন্স প্রোগ্রাম ফোর এৱার্নেস, রিচ এন্দ নোলেজ ওন স্পেস ( এন ই- স্পার্কস) হায়বা প্রোগ্রাম মখাদা শীন্দুনা পাঙথোকখিবনি হায়রি। হায়রিবা প্রোগ্রাম অদূ নোরথ ইষ্ট স্পেস এপ্লিকেশন সেন্টর না ইন্দিয়া লৈঙাক্কি মিনিষ্ট্রি ওফ দোনরগী ইনিসিয়েটিব মখাদা পায়খৎপনি।
ইনিসিয়েটিব অদূ মনিপুর লৈঙাক্কা কোল্লাবোরেট তৌদুনা পায়খৎপনি। টুর অদূ শীনবগী মরূ ওইবা পান্দমদি নৌরিবা মহৈরোয়শিং অদুদা মখোয়না স্পেস সাইন্স অমসুং টেক্নোলোজিগী মরমদা খঙনীঙ- উনিংবা কয়াদু হকথেঙননা উহনবা অমসুং খঙহন্ননবনি হায়রি।