হৌখিবা পূঙ ২৪ দা খূৎলায় কয়ামরুম সরেন্দর তৌনরকখ্রে

গভর্নর অজয় কুমার ভাল্লানা মনিপুরগী মীয়ামদা অনিরকশুবা অমদি অরোয়বা ওইনা ইল্লিগেল আর্ম পূম্নমক চৎলিবা মার্চ থা অসিগী ৬ ফাওবগী মনূঙদা সরেন্দর তৌরক্ননবা অকনবা ৱার্নিং পীদুনা লাউথোকখ্রবা মতূঙদা মনিপুর তম্পাক্কি তোঙান তোঙানবা পুলিস ষ্টেসনশিংদা মীয়াম্না মশীঙ য়াম্লবা খূৎলায়শিং সরেন্দর তৌনরক্লি। গভর্নরনা পীখিবা, খূৎলায়শিং সরেন্দর তৌরক্ননবগী মতমসু ঙসী লোইরগনি। মখাতানা মতম শাংদোক্লরোই হায়রি।

ঙসী দেথলাইনগী অরোয়বা নুমিৎ অসীদা মায়কৈ কয়াদগী মীয়াম্না পুলিস ষ্টেসনশিংদা অমসুং দিষ্ট্রিক্টশিংগী এস পিগী ওফিসশিংদা মখাতানা ইল্লিগেল আর্ম কয়ামরুম সরেন্দর তৌনরকখিগনি হায়বগী থাজবা লৈরি। ঙসীফাওবদা পীখৎহৌদবা খূৎলায়শিং অদূদি ইল্লিগেল পোসেসন্নি হায়না লৌবগা লোয়ননা ষ্টেট অমসুং সেন্ট্রেল সেক্যুরিটি ফোর্স কি কম্বাইন্ড টিম্না অহীং-নুংথিল খাক্তনা কোম্বীং ওপরেসনশিং মনিপুরগী চীঙ অমসুং তম্পাক্কি তোঙান তোঙানবা মফমশিংদা চত্থরগা খূৎশু- খূৎলায়শিং অদূ নমদুনা লৌখৎকনি হায়রি।

খূৎলায়শিং থমজিন্দুনা লৈরম্বা মীওইশিংগী মথক্তা আইনগী অকনবা চৈরাক পীরগনি হায়না খঙহনবসু লৈখ্রবনি। বিষ্ণুপুর দিষ্ট্রিক্ট কম্মান্দোগী য়ুনিটতা ইন্সাস রাইফল, এস এল আর, থ্রী নোট থ্রী রাইফল য়াওনা খূৎলায় ১০ থা অসীগী মরিদা সরেন্দর তৌরকখি। কুম্বি পুলিস ষ্টেসন্দা খূৎলায় অনী, ফৌগাকচাউ পুলিস ষ্টেসন্দা খূৎলায় অনী, ইম্ফাল ইষ্টকি কম্মান্দো য়ুনিটতা খূৎলায় ১৪, অন্দ্রো পুলিস ষ্টেসন্দা খূৎলায় ১১, পোরোম্পাৎ পুলিস ষ্টেসন্দা খূৎলায় ৫, ইরিলবুং পুলিস ষ্টেসন্দা খূৎলায় ৮, ময়াং ইম্ফাল পুলিস ষ্টেসন্দা খূৎলায় ২০ সরেন্দর তৌরকখি হায়রি।