কুকি- জো মিলিটেন্টশিংনা পায়রিবা খূৎলায়শিং অমত্তা লৌখৎপা ঙমদ্রে, অমুক হন্না লান্দাহনগে হায়রিব্রা: কোকোমি

মনিপুরদা হৌজিক থোক্লিবা হীঙশাগী ঈরাং অসীগা মরী লৈননা ষ্টেটকি গভর্নর অজয় কুমার ভাল্লানা থেঙ্খাং অনীরক্তা অকনবা নোটিস ইস্যু তৌদুনা মীয়াম্না থমজিন্নরিবা ইল্লিগেল আর্ম পূম্নমক চৎলিবা মার্চ থা অসীগী ৬ ফাওবগী মনূঙদা সরেন্দর তৌরক্নবা খঙহনখিববু ঈকায়খুম্নবা ঊত্তুনা তম্পাক্কি মীয়াম্না পায়শীন্দুনা থম্লম্বা খূৎলায়শিং সরেন্দর তৌনরকখ্রে। নাকল অমরোমদা, ম্যান্মার, বংলাদেস, মিজোরাম্নচিংবদগী লোগী ৱাংমদা চিন কুকি- মিলিটেন্টশিংনা পুশিল্লকখিবা মশীং য়াম্লবা অফবা মখলগী খূৎলায়শিং অদূ হৌজিকফাওবা লৈঙাক্না লৌখৎপা ঙমদনা লৈরি।

মসিনা তাকপদি মনিপুর তম্পাক্কি লোইজিং-লোয়াশিংদা লৈরিবা খুঞ্জাশিংদা মখাতানা কুকিশিংনা লান্দাহনখিগে হায়বনি। সেন্টর অমসুং মনিপুর লৈঙাক্না তম্পাক্কি মৈতৈ য়াওল্লূপশিং ক্রেকদাওন তৌদুনা তকখায়রগা কুকি- মিলিটেন্টশিং য়োকখত্তুনা থম্ননবগী থৌরাং অমা চত্থরক্লব্রা হায়বগী চিংনবা চাউনা লৈরক্লে হায়না কোর্দিনেটিং কম্মিটি ওন মনিপুর ইন্টিগ্রিটি (কোকোমি) গী কনভেনর খূরায়জম অথৌবনা ফোঙদোকখ্রে।

লম্ফেলদা লৈবা কোকোমিগী ওফিস্তা পাঙথোকপা পাউমীশিংগা উনখিবা থৌরমদা মহাক্না ৱাফম অসী ফোঙদোক্লদুনা হায়, গভর্নরনা পীখিবা নোটিসকি মতূঙ ইন্না তম্পাক্কি মীয়াম্না খূৎলায়শিং সরেন্দর তৌনরকখ্রে অদূবু চীঙদা পায়রিবা খূৎলায়শিং সরেন্দর তৌরকপদি অমত্তা লৈত্রি। ওফিসিয়েল রেকোর্দ মতূং ইন্না হৌজিকফাওবদা খূৎলায় ৪০১০ তম্পাক্কি মীয়াম্না সরেন্দর তৌনরকখ্রে হায়বগী রেকোর্দ লৈরে। চীঙদা পায়রিবা খূৎলায়শিং অমত্তা সরেন্দর তৌরক্তবনা মরম ওইরগা মৈতৈদা অমুক হন্না লান্দারকপা তারবদি ষ্টেটকি গভর্নর অমসুং সেন্টর লৈঙাক্না মদূগী তেকচাক খূদীঙমক পুগদবনি হায়না অথৌবনা অকনবা ৱার্নিং তৌখি।