ক্বেসন লিক ওইরকখিবদা চেন্নবা ওজা অমসু নৌনা ফাগৎপা ঙম্লে: এন জোন

হৌখিবা ফেব্রুয়ারি ২৫ দা কাউন্সিল ওফ হায়র সেকেন্দরি ইদুকেসন মনিপুর (কোহসেম) না কন্দক্ট তৌদুনা হৌজিক চত্থরিবা এগজামিনেসন অসীগী সোসিয়েল সাইন্স থোকপা নুমিত্তা ক্বেসন লিক ওইহনখিবা থৌদোক্কা মরী লৈননা ওজা অমা য়াওনা মীওই অনী চৎলিবা থা অসিগী ৩ দা সজিৱাদা লৈরিবা সেন্ট্রেল জেলদা জুদিসিয়েল কষ্টদি রিমান্দ পীখ্রবা মতূঙদা মার্চ অহুমদা ফিজিক্স সবজেক্ট থোকখিবা নুমিত্তসু মখা তানা ক্বেসন লিক ওইরকপদগী কোহসেমগী কন্ট্রোল্লর ওফ এগজামিনেসন্স না থৌদোক অসীগী মতাংদা চেন্নবশিং ফাগত্তুনা অকনবা আইনগী ওইবা চৈরাক পীননবা ফোর্মেল কমপ্লেন্ট অমা ইম্ফালদা লৈরিবা সাইবর ক্রাইম পুলিসতা থাঙ্গৎখিবগী মখা তারকপা দেভলপমেন্ট ওইনা ওজা অমসু ফাগৎপা ঙমখ্রে।

ফাগৎখ্রবা ওজা অসী থৌবাল দিষ্ট্রিক্ট কি মনূঙ চন্না লৈরিবা পেরাদাইজ ইংলিস স্কুলদা ফিজিক্সকি ওজা ওইনা লৈবগী মথক্তা হন্দক পাঙথোক্লিবা কোহসেমগী এগজামিনেসন অসিদা স্কুল অসিমক্তদা সেন্টর তারক্তুনা এসিষ্টেন্ট ওফিসার ওইনা দ্যুটি তাবনি। এসিষ্টেন্ট ওফিসার ওইবগী খুদোংচাবদু লৌরগা অরানবা থৌওং অদূ চত্থরম্বনি হায়না সাইবর ক্রাইম পুলিসকি এস পি নিঙোম্বম জোন্ না মহাক্কি ওফিস চেম্বরদা পাঙথোকপা পাউমীশিংগা উনখিবা থৌরম অমদা ফোঙদোকখি।

অরানবা থৌওং চত্থবদা চেন্নরম্লিবা ওজা অদুগী মমীংনা মাইবম সুনিল (৩৩)  অপোকপা এম ইবোমচা কৌই, থৌবাল দিষ্ট্রিক্ট কি নেপ্রা কম্পেনি মখা লৈকায়দগীনি হায়না জোন না ফোঙদোকখি। ওজা অসী মশাগী লন্নাই ওইনা মহৈরোয়শিং লৈননবা হোষ্টেল অমসু চল্লাইরিবনি হায়না জোন না মখা তানা ফোঙদোকখি।