লেন য়াওবা নোংলৈ নুংশিৎনা মফম কয়াদা চাউনা অমাঙ- অতা থোকহনখ্রে

চৎলিবা মার্চ থা অসীগী অনীগী অঙনবা অয়ুক পূঙ অনীরোম তারকপদগী নোং ঙাল্লমদাই পূঙ ৩.৩০ অদুফাওবদা লেন য়াওনা শীৎখিবা অকনবা নোংশিৎনা মনিপুরগী মফম কয়াদা চাউনা অমাঙ- অতাশিং মায়োক্নহনখ্রে। থৌবাল দিষ্ট্রিক্ট কি ৱাংখেম কেন্দ্র মনূঙচন্না লৈরিবা য়াইরিপোক কেক্রু, খোইরোম অমদি হৈত্রোইপোকপী এরিয়াদা লৈবা য়ূম কয়ামরুম অকনবা নোংলৈ-নুংশিৎনা মাঙ-তাকহনখ্রে। মনিপুরগী গভর্নরনা অমাঙ- অতা থোকখ্রবা য়ূম্বুশিং অদুদা মতীক চাবা তেঙবাং পীবিরক্ননবা কেন্দ্র অসিগী এম এল এ কৈশাম মেঘচন্দ্রনা গভর্নরদা তকশীনখ্রে। মফমশিং অদুদা কোয়না চত্তুনা য়েংশিল্লবা মতূঙদা এম এল এ অসিনা পাউমীশিংদা হায়, নুমীৎ অদূগী লাইবক থীরবা অহিংদা শীৎখিবা লেন য়াওবা নোংলৈ নুংশিৎনা মহাক্কি কেন্দ্রগী অয়াম্বা মফমশিং অমাঙ- অতা মায়োক্নহনখি।

খূল অহূম অসীগী জিঙ্খনা কূপ্পা অয়াম্বা য়ূমশিং চাউরবা লেন মতূমশিং হৈথরকখিবা থৌদোক অদূদা অমাঙ- অতা থোকখি। য়ূম কয়া অমসু অকনবা নোংলৈ-নুংশিৎনা হুমদোক্তুনা পুখি। মনা- মশীং কয়া লেন্না ফূদৎলম্বদগী পাক-সন্না মাঙহনখি। মরম অসীনা মনিপুরগী গভর্নরনা মরী লৈনবা দিপার্টমেন্ট গী ওফিসিয়েলশিং থাবিরক্লগা দিমেজ এসেসমেন্ট তৌবিবগা লোয়ননা পীবা য়াবা তেঙবাংশিং পীবীয়ু হায়না মেঘচন্দ্রনা আপিল তৌখি।

নাকল অমরোমদা, ইম্ফাল নোংচূপ পানাগী ময়াং ইম্ফাল এরিয়াগী মফম কয়াদসু অকনবা নোংলৈ- নুংশিৎকা লোয়ননা লেন তাশিনবদগী অমাঙ- অতা পাক- সন্না থোকখ্রে। লিলোং অমসুং বিষ্ণুপুর দিষ্ট্রিক্ট কি মফম কয়াদসু অকনবা নোংলৈ-নুংশিৎনা অমাঙ- অতাশিং মায়োক্ন খি। ইম্ফাল ইষ্টকি মফমশিংদসু অকনবা নোংলৈ-নুংশিৎনা অমাঙ – অতা কয়া থোকখি অদুবু মফম অসিদদি লেন কা হেন্না তাখিদ্রে হায়রি।