হৌজিক কাউন্সিল ওফ হায়র সেকেন্দরি ইদুকেসন, মনিপুর ( কোহসেম) না কন্দক্ট তৌদুনা মনিপুরগী তোঙান তোঙানবা এগজাম সেন্টরশিংদা চত্থরকখিবা এগজাম অসীগী ঙরাং ফিজিক্স সবজেক্ট থোকপা নুমিৎকি এগজাম হৌদ্রিঙৈ মিনিট ১০ গী মমাঙদা ক্বেসন লিক ওইবগী মতাংদা সোসিয়েল মেদিয়াদা ভাইরেল ওইরকখিবা অসী য়াম্না লাইবক থীবনি হায়না ষ্টুডেন্টস য়ুনিয়ন ওফ কংলৈপাক ( সুক) না ফোঙদোকখ্রে।
থৌওং ময়ামসি য়েংশিনবিদুনা চেন্নরিবা মীওইশিংগী মথক্তা আইনগী অকনবা চৈরাক পীবীয়ু । মদূ নত্রবদি মহৈরোয়শিংগী লূপ অসীনা মীয়ামগা লোয়ননা হেন্না অকনবা খোঙজঙশিং মহৈরোয় অমসুং মীয়ামগী তুংলমচৎকিদমক চঙশীল্লগনি হায়না পাউমীশিংগা উনবদা ফোঙদোকখি।
মহৈরোয় লূপ অমা ওইনা ষ্টুডেন্টস য়ুনিয়ন ওফ কংলৈপাক না অসীগুম্বা লৈঙাক্কি লূজদবা থৌওং কয়া অসী তুমিন্না য়েংদুনা লৈথোক্লোই হায়না লূপ অসীগী জেনরেল সেক্রেটরি টি ঐচ তরুনকুমারনা পাউমীশিংগা উনবদা ফোঙদোকখি।মমাঙগী চহীশিংগা য়েংনবদা বোর্দ না লৌবা ওইরবসু নত্রগা কোহসেম্না কন্দক্ট তৌববু ওইরবসু মওং মরীল তাদবা থৌওং কয়ামরুম থেংনরি। মসী অফবা খূদম অমা নত্তে হায়না মহাক্না মখাতানা ফোঙদোকখি।