ক্বেসন লিক ওইহনবদা চাউনা চেন্নরিবশিংগী মথক্তা মতীকচাবা চৈরাক ফংহল্লু:দেসাম

হৌখিবা ফেব্রুয়ারি ২৫ দা কোসেম্না লৌবা হায়র সেকেন্ডরি স্কুল লিভিং সার্টিফিকেট ইগজামিনেসনগী সোসিয়েল সাইন্স সবজেক্ট থোকপা নুমীত্তুদা ইগজামিনেসন হৌগদবা পূঙখায় অমগী মমাঙদা ক্বেসন লিক ওইহনখিবগী থৌদোক অদূ খ্বাইদগী লাইবক থীবা অমসুং লমদমসিগী ইদুকেসনগী পুৱারিদা অমুবা কালিনা ইদুনা লৈহৌরগদবা থৌদোক অমনি। ক্বেসন লিক ওইহনবদা চাউনা চেন্নবা মীওইশিং মনিপুর পুলিস অমসুং সাইবর ক্রাইম পুলিসনা মতম চানা ফাগৎপা ঙমখিবা অদূ য়াম্না শীঙথানিঙায়নি, অপেনবা পোকই হায়না দেমোক্রেটিক ষ্টুদেন্স এল্যায়েন্স ওফ মনিপুর (দেসাম) না ফোঙদোকখ্রে।

ক্বেসন লিক ওইহনখিবগী থৌদোক অদূগা মরী লৈননা ইম্ফালগী ক্বাককৈথেল দা লৈরিবা দেসামগী হেদ ওফিসতা ঙরাং পাঙথোকখিবা পাউমিশিংগা উনখিবা থৌরমদা দেসামগী সেক্রেটরি জেনরেল নোংথোম্বম থোইথোইবনা ৱাফম কয়া থমখি।  মহাক্না হায়, ফেব্রুয়ারি ২৫ দা থোকখিবা সোসিয়েল সাইন্স সবজেক্ট অদূগী ইগজাম হৌগদবা পূঙখায় অমগী মমাঙদা ক্বেসন লিক ওইহনখিবগী থৌদোক অদূ থোকখি। মদূ তোঙান তোঙানবা সোসিয়েল মেদিয়া প্লেটফোর্মশিংদা খূদক্তা ভাইরেল ওইরকখি।

থৌবালদা লৈবা লিট্টল ষ্টার ইংলিস হায়র সেকেন্দরি স্কুলদা থোকখিবা ক্বেসন লিক ওইহনখিবগী থৌদোক অদূদা চেন্নরিবসি স্কুল অদূগী ফাউন্দর ভাইস প্রসিদেন্ট য়ূম্নাম রঞ্জিৎ সিংহ অমসুং ইগজাম অদূগী এ ও সি ওইখিবা সমাদ্রাম মেঘচন্দ্রনি। পুলিসনা মতম চানা মখোয় অনিবু ফাগৎখিবসি থাগৎলি। খুন্নাইগী মহীক ওইরবা, ওজা খুন্নাইগী মায়থোঙদা অমুবা কালি তৈশীল্লিবা মীওই অনী অসীগী মথক্তা অকনবা আইনগী চৈরাক পীদবদি য়ারোই হায়না মহাক্না ফোঙদোক্লদুনা মখোয় অনিবু মতম চূপ্পগী ওইনা জেলদা থমগদবনি হায়না অকনবা দিমান্দ তৌখি।