মনিপুরদা চৎলিবা ফেব্রুয়ারি থা অসীগী ১৩ দগী প্রসিদেন্ট রুল থমজিল্লকখিবা অসী মখা তানা শাংদোরকপা য়াবগী থাজবা চাউনা লৈখ্রে। মসীগা লোয়ননা ষ্টেট অসীগী গভর্নর ওইরিবা অজয় কুমার ভাল্লানা রুলসকি মতূঙ ইন্না লৈঙাক-সাসনগী থবক থৌরমশিং পায়শীনখ্রবা মতূঙদা ওল্ড অমসুং ন্যূ সেক্রেটরিয়েত্তা লৈরিবা মিনিষ্টরশিংগী ওফিস পূম্নমক জেনরেল এদমিনিষ্ট্রেটিব দিপার্টমেন্টনা থোঙ লোন্সীনখ্রে। ওল্ড সেক্রেটরিয়েত্তা লৈরিবা, হান্না ইদুকেসন মিনিষ্টর ওইরম্বা থৌনাউজম বসন্ট কুমারগী ওফিস পায়শীনখিবগা লোয়ননা মফম অসিদা মহাক্কি ওফিস হাংদোক্তুনা লৈঙাক্কি থবক থৌরমশিং পাঙথোক্ননবা থৌরাং তৌখ্রে। মহাক্না চয়োল অমগী মনূঙদা মফম অদুদা নুমীৎ হুম্নি ফম্লগা লৈঙাক্কি থৌদা-থৌরম পূম্নমক পাঙথোক্লগনি হায়রি।
হান্নগী হীলস এন্দ ট্রাইবেল এফিয়র্স মিনিষ্টর লেটপাউ হাওকিপ্না ফম্লম্বা ওফিস অদূসু গভর্নরগী এদভাইজরনা ফম্ননবা মফম ওইনা নৌনা শেমগৎখ্রে। চৎলিবা থা অসীগী ১৭ তা গভর্নর অজয় কুমার ভাল্লানা মনিপুরগী চিফ সেক্রেটরি, দি জি পি, সেক্যুরিটি এদভাইজর অমদি তোঙান তোঙানবা দিষ্ট্রিক্টশিংগী দেপ্যুটি কম্মিস্নারশিংগা মীফম পাঙথোক্তুনা লৌখিবা ৱারেপকি মখা তারকপা খোঙথাং ওইনা অনৌবা দেভলপমেন্ট অসী লাকখিবনি।
মনিপুরদা থম্লিবা প্রসিদেন্ট রুল অসি ঙসি-হয়েং লৌথোকখিবা য়াবগী ফীভম অদূদি হৌজিক ওইরক্লিবা লৈঙাক সাসনগী মতৌ অসী য়েংলুবদা থাজনিঙায় ওইদ্রি হায়না মায়কৈ কয়াদগী ফোঙদোক্নরক্লি।
You may also like
-
কাংপোকপি তম্না সেক্যুরিটি এস্কোর্ট তৌদুনা অচা-অথক পুরকপদা মীয়ামগা মূক্নখ্রে
-
চিফ মিনিষ্টরনা লেকচররশিংগা ফম্মিন্নদুনা চাওখৎ-থৌরাংগী মতাংদা খন্নখ্রে
-
এ সর্দা রাজ্য সভাগী মেম্বর ওইনা ৱাশক লৌখ্রে
-
লিলোং হাওরৈবী ঙাঙৌ লৌকোল পল্লি তাবা লম্বী হান্নগী মতৌগুম পাকথোক্লগনি
-
খূরায়গী মীওই ৮৭৬ তা নফসাগী কার্দ য়েন্থোকখ্রে